Drayber sa Ceres Bus nga nalimbuwad niadtong Huwebes sa buntag, Mayo 26, sa nasudnong dalan sa Lomboy Park sa Barangay Jimilian, lungsod sa Loboc, Probinsiya sa Bohol ang posibleng mag-atubang og kaso human duha sa mga biktima nga nangaangol ningluwat sa ilang affidavit.
Si Police Staff Sergeant Christopher Asilo, imbestigador sa kaso, niingon nga sa 17 ka mga biktima nga nangaangol, duha kanila ang ningpadayon sa pagpasaka og kaso batok sa drayber nga si Nick Lubiano, 44, lumolupyo sa Barangay Banban, lungsod sa Lila.
Matod ni Asilo nga sa kinatibuk-an, moabot ngadto na sa 19 ka mga nangaangol human nalimbuwad ang Ceres bus, lakip na niini ang drayber ug konduktor.
Ang nangaangol mao si Mark Alfred Asombrado, 27, konduktor, ug sila si Noela Daling, Wilma Omac, Helen Madronero, Nelfa Inson, Dwell Joy Sarabia, Cornelio Valloso, Isiah Lagahid, Gloria Apor, Christian Rovera, Joseph Ypes, Jerome Español, Maurello Lagahid, kinsa pulos naa pa na-admit sa Bohol Provincial Hospital.
Samtang sila si Joel Castrodes, Flaviana Bagut, Nelfa Luzon, Angel Karen Alesna, ug Fe Vergara, nakauli na sa ilang panimalay.
Sa pakisusi sa kapulisan sa nahisgutang lungsod, ang Ceres bus nawad-an og brake ug wala na makontrolar sa drayber hinungdan nga nalimbuwad human nisuway kini sa pag-overtake sa usa ka wing van.
Ang hepe sa Loboc Police nga si Police Lieutenant Camilo Estrera niingon nga accident prone ang dapit ug dili angay mo-overtake tungod kay kurbadahon ang maong dalan.
Dugang ni Estrera nga iya na kini gitugyan sa piskalya ang kaso kon unsay hukom niini hinungdan nga sa kasamtangan nagpabilin pa gihapon nga ana- sa ilang kustodiya ang drayber sa maong Ceres bus ug ang bus unit nga gimaneho.
Ang drayber mag-atubang og kasong reckless imprudence resulting to multiple serious physical injury, dason ni Estrera.