Human sa mga tuig nga sila kauban sa trabaho, nadiskubrehan sa duha ka mga babayeng kawani sa gobyerno nga sila magsuon tungod sa uniporme ug sa paningkamot sa pagsubay sa kontak ni Lapu-Lapu City Epidemiologist Grace Mary Chan-Carungay.
Sila si Medical Technologist (MedTech) April Arado Pausal, 40, ug ang iyang 62-anyos nga igsuong midwife nga si Elizabeth Arado, pulos mga trabahante sa Lapu-Lapu City Health Office (CHO).
Wala masayod ang duha nga managsuon diay sila hangtod sa ilang panagkita niadtong Martes, Abril 24, 2022.
“Awkward and happy kay wala na ko magdahom,” matod ni April nga naghulagway sa iyang gibati dihang nagkaila sila ni Elizabeth.
Sulod sa lima ka tuig, sila nagkauban, nagkita sa usag usa sa panahon sa opisiyal nga mga panagtapok, taliwala sa ubang mga buluhaton, apan ang apelyido sa minyo nga April maoy nitago sa ilang koneksiyon.
Emosyonal usab kaayo si Elizabeth sa ilang surprise meeting sukad nga gisultihan siya sa iyang amahan bahin sa iyang mga igsuon sa wala pa kini namatay niadtong 2012.
Si April anaa sa nagsagol nga emosiyon sa dihang iyang nahimamat ang iyang biological nga inahan ug sa dihang iyang nahimamat si Elizabeth.
PAGSUBAY
Kaniadtong Lunes, Abril 23, 2022, na-trace ni April ang usa ka empleyado nga nagdala sa apelyido sa iyang amahan pinaagi sa listahan sa mga empleyado ug ang size sa ilang uniporme. Nakita usab ni Carungay kini nga ngalan ug “contact-traced” nga si Elizabeth.
Si Lapu-Lapu City Mayor Junard “Ahong” Chan nigahin og pundo alang sa bag-ong uniporme sa mga empleyado alang sa iyang bag-ong administrasiyon.
Ang epidemiologist sa siyudad nagduda na nga ang duha managkadugo sanglit pareho man sila og estorya bahin sa ilang amahan dihang buwag silang gipangutana. Dayon iyang gipatawag sa usa ka miting ang duha.
Pagkaugma Martes, gipatawag ni Carungay sila si April ug Elizabeth sa CHO.
Nasurprisa ang duha kay usahay gitahasan sila sa paghimo og contact tracing ug karon gi-trace na sila. Gisultihan lang sila nga mo-report.
Pag-abot sa duha, gipaila-ila sila ni Carungay.
PANAGTAGBO
Emosiyonal kaayo ang panagtagbo ug natandog ang tanan. Nanghilak ang mga empleyado sa CHO nga nakasaksi.
Si April nadistino sa buhatan sa CHO, samtang si Elizabeth nadistino sa Isla sa Olango.
Nakaamgo si Elizabeth nga sa kataposan iyang nahimamat ang igsuong babaye nga gihangyo kaniya sa iyang amahan nga pangitaon.
Ang iyang amahan nga si Percival, sa wala pa namatay kaniadtong 2012 sa edad nga 82, nisugid nga sila adunay mga igsuon gikan sa laing pamilya ug gihangyo si Elizabeth nga pangitaon sila.
UNSAY ESTORYA
Parehas silang anak ni Percival Arado Sr. apan gikan sa managlahing inahan.
Si April niingon nga si Percival minyo sa inahan ni Elizabeth.
Si Elizabeth nagpabiling dalaga ug adunay pito ka mga igsuon gikan sa iyang inahan.
Ang inahan ni April nga si Amelita dunay tulo ka mga anak gikan kang Percival: Teodorico, kinsa bag-o lang nakapasar sa bar ug karon usa na ka abogado, April, nga usa ka medtech ug Marlyn, kinsa usa ka magtutudlo.
Gipadako ni Amelita si Teodorico ug ang bata naninguha sa pagtungha hangtod sa kolehiyo ug law school.
Nisamot kalisod ang kinabuhi alang kang Amelita ug misamot pa dihang nagsabak na usab siya kang April.
Usa niana ka higayon, nahimamat ni Amelita si Praxedes samtang sila sakay sa barko gikan sa Butuan City paingon sa Sugbo. Sa ilang panagkita, iyang gitanyag nga sagupon ang iyang anak ngadto kang Praxedes.
Niadtong panahona, sila si Praxedes ug iyang bana nga si Jesus adunay sinagop nga anak ug duha ka biological nga anak sa lungsod sa Cordova.
Isip midwife sa lungsod, nisugot si Praxedes ug nipuyo si Amelita sa magtiayon sa Cordova hangtod nga nanganak siya kang April.
ANG PAGTUG-AN
Milabay ang katuigan, nagtungha si April sa elementarya ug high school sa Cordova ug nipadayon sa pagtungha sa kolehiyo sa Iligan diin dunay mga paryente ang magtiayon.
Dihang nigradwar si April sa kolehiyo, gisultihan siya ni Praxedes nga adopted child siya.
Naatol niadtong tungora, nibisita si Amelita sa magtiayon ug gipailaila siya ni Praxedes kang April. Naghinilakay silang duha.
“Nagsagol ang akong emosiyon kaniadto, nasuko ko. Pero kinahanglan nako dawaton ug tun-an ang paghigugma,” ni April nga naghulagway sa iyang gibati ngadto kang Amelita.
Nasuko siya kang Amelita nga gibilin siya sa magtiayon ug nganong wala magsakripisyo ang iyang inahan sa pagpadako kaniya.
Apan gipasabot siya ni Amelita niadtong tungora nga gusto lang niya nga makabaton siya og “maayong kaugmaon,” hinungdan nga iyang gitanyagan ang magtiayong Arong.
Ang manghod ni April, si Marilyn, gisagop sab sa kabanay ni Jesus.
MILAMPOS
Ug natinuod ang damgo ni Amelita, ang tanan niyang mga anak mga propesiyonal na: usa ka abogado, usa ka MedTech ug usa ka magtutudlo.
“Natandog sab ko ni mama (Praxedes) with more nako gi-appreciate ang iyang efforts on us,” matod ni April.
Siya niingon nga si Praxedes usa ka mapanalipdanon nga inahan ug gibadlong ang tanan sa iyang pagkabata nga misulay sa pagdaogdaog kaniya tungod sa pagkasinagop. (REV gikan sa PR)