Gisalikway sa Department of Health (DOH) ang mga huhungihong nga mohatag ang gobyerno og mga insentibo ug awards sa mga indibidwal nga giingong nabiktima o adunay dili maayong kasinatian sa mga bakuna sa coronavirus disease (Covid-19).
Ang DOH nihimo sa pagklaro sa usa ka advisory human masayri nga adunay mga impormasiyon o mga mensahe nga naglibot isip bakak nga mga saad ug mga tanyag nga mga insentibo sa bakuna.
“We urge everyone to always check official DOH sources before forwarding anything, ‘’ matod niini, samtang ang DOH nag-awhag sa publiko sa pagpapas ning chain messages.
“Instead of spreading false and unverified rumors, let’s be responsible and do our part in sharing the right information. Lets save lives before you click,” dugang niini.
Ilang gisubli nga ang tanang bakuna nga gihatag sa gobiyerno napamatud-an nga luwas ug epektibo tungod kay niagi na kini sa local ug global peer reviewed nga mga pagtuon ug pagsusi sa mga eksperto.
Giklaro ni Dr. Mary Jean Loreche, chief pathologist sa DOH Central Visayas, nga ang gobiyerno maoy moabaga sa pagpaospital ug pagtambal kon adunay dili maayong epekto human sa pagbakuna sa batok sa Covid-19 nga makaapekto sa mga gibakunahan.
Base sa ilang guidelines, si Loreche niingon nga ang mga pasiyente kinahanglang ma-admit sa mga ospital ug madumala sa giila nga mga pasilidad sa gobiyerno.
“The hospitalization and treatment is shouldered by the national government through PhilHealth (Philippine Health Insurance Corporation) case rate coverage and these patients must be admitted and managed in identified government facilities,” matod niya.
Dugang pa sa pangu nga pathologist nga ang nahisgutan nga tabang dili matawag nga mga insentibo o mga awards, kay kinsa may ganahan nga kini mahitabo.
“It only means we are encouraging people to get vaccinated and should, god forbid , an adverse effect or reaction happens, there is the assurance that the government through PhilHealth will help with the cost,” siya nidugang.
Matud pa ni Loreche nga anaa na sa 10,036,335 ka doses sa mga bakuna ang naapod-apod na sa nagkalain-laing local government units (LGUs) sa rehiyon sukad niadtong Biyernes, Mayo 27, 2022.