Nagtuo ang kapulisan nga ang wa pagpautang maoy motibo sa pagpatay sa usa ka 67 anyos nga biyuda niadtong Huwebes, Mayo 26, sa Brgy. Greenhills, San Fernando, habagatang Sugbo.

Si Police Major Efren Diaz, Jr., hepe sa San Fernando Police Station nga nahinabi sa Superbalita Cebu, nagkanayon nga lig-on ang testimoniya sa duha ka mga saksi.

Ang usa maoy nakakita kang Larry Lantape Sabellano, 37, sa crime scene samtang ang usa iyang gibayran og nagkadugo nga P1,000 human siya gipaninglan sa utang.

Matod ni Diaz nga si Sabellano nangutang kang Diomedisa Lapera Gedaro, apan gibalibaran.

Nagtuo si Diaz nga nasuko si Sabellano nga wa pautanga mao nga iyang gitulis ug gipatay.

Naandan na sa suspek nga magyawyaw ug masuko kon di pautangon, matod sa mga silingan ngadto sa kapulisan.

Si Sabellano mangubkobay og bas, silingan ra ni Gedaro.

Si Sabellano positibong gitudlo sa duha ka mga babayeng saksi nga maoy nitulis ug nipatay kang Gedaro, negusyante’g utananon sa lungsod.

NAKIT-AN

Si Police Senior Master Sgt. Herbert Pananganan, imbestigador sa Fernando Police Station nga nahinabi sa Superbalita Cebu, nagkanayon nga si Sabellano nakit-an sa duha ka mga saksi nga nagkadugo nga nagdalig lakaw palayo sa crime scene nga nagbitbit sa shoulder bag sa biktima.

Matud ni Pananganan, nga sekreto nga ningduol kanila ang duha ka mga saksi atol sa ilang imbestigasiyon.

Gisubay nila si Sabellano, apan wala kini diha sa ilang balay dihang ilang giadto niadtong Huwebes.

Nibalik sa Biyernes sa udto ang suspek ug gipahibawo ang kapulisan nga nahibalik na si Sabellano sa ilang balay.

Ilang gisikop ang suspek sa dapit diin siya magtapok sa mabaligyang bas.

NANGHIMAKAK

Si Sabellano dihang gipusasan hugtanong nanghimakak sa pasangil batok kaniya.

Siya nangangkon nga wala siya sa ilang lugar atol sa kremin kay nanghuwam siya og kwarta sa iyang higala.

Apan sa pagsukitsukit sa kapulisan kon asa siyang lugara o taga diin iyang higala, wa na siya nakatubag.

Dihang ilang gipakita ang duha ka mga saksi kang Sabellano, positibo kini nilang gitudlo.

Wa na marekuber sa kapulisan ang plamingko nga giingong maoy gigamit sa suspek.

Ang anak sa biktima nibutyag sa kapulisan nga kapin sa P11,000 ang cash nga dala sa iyang Inahan.

Sayo sa buntag niadtong Huwebes nibiya ang iyang inahan sa ilang panimalay kay magbayad sa bill sa kuryente, lending, ingon man mangompra.

Si Pananganan nagkanayon nga gi-andam na nila ang affidavit sa mga saksi alang sa kasong robbery with murder.

Gibutyag ni Pananganan, nga sa ilang nakuhang impormasiyon, si Sabellano nabilango na sa Cebu City Jail.

Si Gedaro nakaplagan sa kabugangan nga ubos sa usa ka pangpang diin siya gihulog sa suspek.