Maguwang sa usa ka pasyente nga masakiton nga gidala sa Eversley Childs Sanitarium and General Hospital sa dakbayan sa Mandaue nireklamo tungod sa giingong dili maayo nga pag atiman sa pasiyente ug pagtagad sa mga kawani sa maong ospital.
Gawas niini, gi-release ang ilang pasiyente sa tambalanan bisan kon giingong di pa maayo ang kondisiyon.
Si Zenaida Kohutan, 65, igsuon sa pasiyente nga si Nasser Pagadaya, lumad nga taga Tetuan, Zamboanga Del Sur gidala sa anak niini dinhi sa Sugbo aron maatiman niadtong Sabado, Mayo 21. Si Kohutan nagpuyo sa lungsod sa Compostela, amihanang Sugbo.
Niadtong Mayo 22, Dominggo sa hapon si Pagadaya gidala dayon sa Eversley.
Naglisod na kini sa pagginhawa ug taas ang temperatura sa hilanat.
Pag-abot sa ambulansiya, nahukman nga sa Eversley Childs Sanitarium sa Brgy. Jagobiao, dakbayan sa Mandaue, dad-on.
Wa na nikuyog si Kohutan kay siya senior citizen.
Nipasangil si Kohutan, base sa sulti sa iyang anak, nga wa sila tarunga og tagad sa mga nurse ug doktor sa emergency room.
"Ang ilang gibuhat didto wa nila giayo pagtagad ang pasyente bisag di na makaya sa lawas sa ako igsuon, ang tambal na ilang gihatag dili mao, unsaon man pagkaayo sa pasyente ana kon sayop inyo gihatag nga serbisyo?," matod sa post sa Facebook ni Kohutan.
Gipaubos pa sa puasa o fasting kay kuhaan og dugo aron mahiling sa laboratoryo, apan matod niya nga nalimot pa ang nurse sa pagkuha.
"Ila gihatag nga resita sayop. Ang pag dextrose nila sa hospital isa ra ka adlaw bisag luya kaayo akong igsuon. Ila dayun gipapauli pag Lunes kay oka na daw. Ila pud tag-an-tag-anon ang sakit nga sakit daw sa atay unya naa koy nabasahan nga resita nga akong gitan-aw, Sir, tambal man to sa hubak," dugang ni Kohutan.
Gi release sila nga alang nila di maayo ang kahimtang sa iyang igsuon, apan ang gamay nga papel gikuha sa gwardya sa ospital.
Matod ni Kohutan nga di pa maayo og taras ang mga nurse ug giingong gikasab-an ang iyang igsuon sa radio technologist kay i-xray unta, apan di makabarog ang iyang manghod kay luya.
"Unya ug mangayo mi og resulta sa among pasyente dili pa sila mohatag sa resulta, daghan daw mi pangutana," dugang ni Kohutan.
Sa Miiyerkules tungod kay sige pa man og reklamo ang iyang igsuon sa balatian, nakahukom sila nga manawag og ambulansiya didto na sa Provincial Hospital sa dakbayan sa Danao nila gidala.
Ang iyang manghod napaubos na sa x ray ug arang arang na ang panglawas niini.
Napalgan sa examination nga duna kini acute pneumonia.
Samtang ang direktor sa Eversley, Child Sanitarium and General Hospital nga si Dr. Pythagoras Zerna nga gikuhaan sa iyang habig nibutyag nga human siya nakahibawo sa reklamo, iya kining ipaimbestigar kon unsa ka tinuod ang akusasiyon sa tagtungod sa pasyente.
"Ako sa ning ipa investigate no kay it would be unfair also kon we will pass judgment diretso sa mga panghitabo unya wala man ko kahibalo sa mga detalye sad. Kay sometimes basin naa lang mga understanding ba, pero I am not sure ha that is why we will investigate this," matod ni Zerna.
Matud ni Zerna nga iyang susihon kon duna bay pagpabaya ang iyang mga staff.
"Para makabalo sab ko kon naa ba gyud lapses.Lisod man gyud mo jump into a conclusion kon one sided lang ta mao na nga ato ning susihon,"dugang ni Zerna.
Iyang gisaad nga kon mamatud-ang dunay sad-an, di kini niya palabyon.
"Yes we will not tolerate and condemn if there is," dugang niya.
Matod ni Zerna nga di angay nga pagawason ang pasiyente kon di pa kini maayo.
"Naa man gud tay protocol noh before igawas ang pasyente depende man gud na sa status sa pasyente kon angayan naba i-release o dili pa. Anyway apil na siya sa dagan sa atong imbestigasyon," dugang ni Zerna.