Nakadawat og imbetasyon aron moapil sa Gilas Pilipinas training pool ang MVP ug sa samang higayon Rookie of the Year awardee sa bag-uhay lang nahuman nga National Collegiate Athletic Association (NCAA) Season 97 nga si Rhenz Abando.
Si Abando maoy nangulo sa Letran Knights sa dominanteng pagsakmit sa kampyunato sa NCAA Season 97 diin wala sila nakatilaw og pilde sulod sa 12 ka mga duwa.
Ang 6’2” nga magduduwa nag-average og 15.73 puntos, 6.36 rebounds, 1.73 assists, ug 1.27 blocks sa labing una niyang tuig sa Knights.
Sa sayo pa, nagkanayon si national coach Chot Reyes nga nagplano siyang collegiate stars ang iyang kuhaon alang sa umaabot nga mga tahas sa Gilas gumikan kay manugsugod na ang bag-ong season sa Philippine Basketball Association (PBA).
“In our plans, it’s going to be composed mostly of UAAP and NCAA players because the PBA is going to be ongoing at that time,” asoy pa ni Reyes sa interbyu sa PlayitRight TV.
Lakip sa mga nahiunang gipanghisgutan ni Reyes mao ang mga sumosulbong nga sila si Lebron Lopez, SJ Belangel, Dave Ildefonso, Carl Tamayo ug James Spencer.