Adlaw na sa paghukom, ang modaog, moabante samtang ang mapilde, manamilit.
Mao kini ang senaryo sa panagharong og balik sa host Miami Heat ug Boston Celtics sugod karong alas 8:30 sa buntag, Mayo 30, 2022 (RP time), alang sa deciding Game 7 sa Eastern Conference finals series sa National Basketball Association (NBA) 2021-22 season.
Ang modaog moabante sa NBA Finals diin naghuwat ang Western Conference champion Golden State Warriors samtang ang mapilde manamilit.
Alang sa duha ka mga kampo, dili ikasurprisa nga naabot og deciding game ang ilang panagparang gumikan kay sila ang ningpatigbabaw nga duha sa East human sa regular season.
“This is the way it should be with these two teams. It should have gone seven games,” matod pa ni Miami coach Spoelstra.
Wala’y tataw nga nakabintaha sa duha ka mga kampo, ang klaro lang nga anaa sa Heat ang homecourt advantage nga maoy nakuha nilang benepisyo isip No. 1 team sa East.
Human natabala sa Heat ang series pinaagi sa 111-103 nga kadaugan sa Game 6, dili ikalimod nga nibalising og gamay ang momentum paingon ngadto kanila.
Apan wala manumbaling ang Celtics niini ug dako gihapon ang ilang pagsalig.
“Scale of 1 to 10? Ten. I mean, it shouldn’t be any less than that, right?” matod ni Celtics All-Star forward Jayson Tatum.
“You know, it’s the last game. That’s what it’s all about.” (AP)