Duha ka mga managlahing kaso sa pagpamusil sa dakbayan sa Sugbo ang nahitabo kagahapon, Mayo 29, 2022.
Unang insidente nahitabo sa batuong dalan sa Sityo Mahayahay, Barangay Guadalupe, pasado alas 5:00 sa kaadlawon.
Si Police Major Jonathan Dela Cerna, hepe sa Guadalupe Police Station, nibutyag nga sa kasamtangan wala pa mailhi ang biktima nga gibanabana nga anaa sa 20-25 ang pangidaron nga nakasul-ob og pula nga sinina samtang grey ang short pants ug dunay tattoo ang tuong pulsohan sa iyang kamot.
Matod ni Dela Cerna, unang nadawat nila nga dunay patay nga lawas ang napalgan apan sa pagsusi na sa lugar, napalgan kining maong biktima ug nasuta nga dunay mga samad pinusilan agi sa armas.
“Gipusil to kay naay naestorya sa atong imbestigador nga duna daw sila nadunggan nga buto pero walay nakakita sa pagpusil,” matod ni Dela Cerna sa Superbalita Cebu
Dugang niya nga unang gisubay karon nila ang pagkatawo sa biktima sanglit nga walay nakaila niini sa dapit.
“Drugs to, kay naay nakuha nga usa ka pakete nga shabu sa biktima mao na atong tan-awon nga anggulo karon, dugang ni Dela Cerna.
Ug way oras nga gintang gikan sa unang pagpamusil, lain na usab ang nahitabo sa Sityo Laray, Barangay Carreta.
Si Police Senior Master Sergeant Erasmo Rosel sa Waterfront Police Station, imbestigador sa maong kaso, niila sa biktima nga si Rexter Leonado Añora, 30, ug molupyo sa Sityo Negative sa nahisgutang barangay.
Matod ni Rosel sa ilang imbestigasyon niining biktima nga si Añora duna ni nakaaway sa hantakan sanglit gikan kini nagduwa og hantak.
Dugang ni Rosel nga si Añora dihang gihiling ang patay nga lawas niini sa mga sakop Scene of Crime Operatives, nakuhaan og duha ka medium pack ingon man duha ka gagmay nga pakete sa shabu ang biktima.
Rason nga ila usab kini nga imbestigahon ang kabahin na sa drugas nga apil sa anggulo nga ilang susihon.
Nahibaloan usab nga ang gipusil patay notado usab nga kawatan ug duna nay rekord sa Waterfront Police Station.
Sa unang kaso, si Dela Cerna niawhag sa pamilya o kabanay nga wa makauli ang ilang sakop sa pagsusi sa biktima nga napalgan sa Guadalupe.
Nagpadayon sa imbestigasyon sa kapulisan sa duha ka kaso sa pagpamusil.