Tulo ang patay ug usa ang angol sa panagbangga sa duha ka mga motorsiklo sa dan sa Barangay Tubod, lungsod sa Barili kagahapon sa kaadlawon, Mayo 29, 2022.

Gideklarar nga dead-on-arrival (DOA) sa tambalanan sa lungsod mao si Emilito Empleo, 38, dunay, kapuyo ug taga Sitio Tambisan, Barangay Mantalungon ug Junmar Salmeron, 24, ulitawo ug taga Barangay Nasipit sa Barili.

Namatay pipila ka oras sa tambalanan si Brian Arias, 19, ulitawo ug taga Nasipit sa samang lungsod.

Samtang, angol si Jasmine Adlawan, 17, taga Barangay Malolos, Barili.

Si Police Staff Sgt. Jeffrey Alpas, Barili Police Station nga nahinabi sa Superbalita Cebu nagkanayon nga si Empleo, sakay sa iyang Euro nga motorsiklo padulong sa iyang tindahan nga lutuanan og bingka sa Proper Mantalungon ug nagkarga og usa ka sakong sugnod.

Gikasugat niya ang Suzuki Smash nga gimaniho ni Junmar Salmeron ug sakay niya sila si Brian Arias, ug Jasmine Adlawan gikan sa disco sa Barangay Malolos nga besperas sa piyesta ug pulos gikatahong nakainom sa ilimnong makahubog.

Sumala ni Alpas, pwerting kusoga nakapadagan ni Salmeron padulong kini mopauli uban sa mga higala.

Gikatahong dihang naabot sa dapit, nawad-an og kontrol sa manobela ug nibangga sa gikasugat nga gimaneho ni Empleo.

Sa kakusog sa impact, nangagusbat ang motorsiklo ug nangalagpot ang tanang biktima nga nangabunal sa karsada.

Pulos walay helmet ang mga batan-on nga gikan sa disco.

Sila si Empleo ug Salmeron pulos DOA sa Barili District Hospital.

Si Arias nakabsan sa iyang kinabuhi sa tambalanan pipila ka oras.

Si Adlawan nakagawas na sa tambalanan kinsa nakaangkog mga pangos sa lawas.

Sumala ni Alpas, ang maong dapit accident prone area human kurbadahon ug nipabulhot sa ilang sakyanan nga nagsalig kay mingaw ang dalan.

Ubay-ubay na ang namatay sa mga nagmotorsiklo ingon man sakyanan, dugang niya.

Ang mga biktima gikatahong sagad hubog hinungdan nga wala na makabalanse sa pagmaneho.