Mas naengganyo si Thirdy Ravena nga mopadayon pagduwa sa Gilas Pilipinas human napakyas ang team pagsakmit og gold medal sa bag-uhay lang nahuman nga 31st Southeast Asian Games sa Hanoi, Vietnam.

Gikan pa niadtong 1989, ang Pilipinas mao na ang nagdominar sa men’s basketball sa matag duha ka mga tuig nga kompetisyon apan sa wala damha, gipakaging ang Gilas sa Indonesia, 85-81, sa inilugay og gold medal.

Mao kini ang nakaputol sa 13 ka sunodsunod nga paghari sa Pilipinas ning maong event nga kinaham sa mga Pinoy.

Si Ravena, kinsa sakop sa napakyas nga puwersa sa Gilas, nagkanayon nga angay ilubong na lang sa limot ang nahitabo kanila sa Hanoi ug magtutok na lang sa umaabot.

“For me, it’s on to the next. There’s not much we can do about it, although we all wish na mas maganda ‘yung nilaro namin for that game, and hopefully we could have pulled off a gold medal,” batbat ni Ravena sa interbyu sa ABS-CBN News.

“It’s done now. The challenge is done, and now there’s a different challenge ahead of us.”

Nagpanikad na si Ravena nga moduwa pagbalik sa Gilas alang sa FIBA World Cup Asian qualifiers ug FIBA Asia Cup 2022 nga ipahigayon karong Hulyo.

Matod ni Ravena nga gusto siyang makatabang sa Gilas nga makabangon gikan sa pagkapandol.

“Motivated, especially with what we just went through. Hopefully mas maganda ipakita natin, and hopefully mas makapag-prepare for the upcoming window,” dugang ni Ravena.

Ang World Cup qualifiers, moasdang ang Gilas sa New Zealand aron makigbatok sa India karong Hulyo 1 ug host team karong Hulyo 3.

Ang FIBA Asia Cup ipahigayon sa Jakarta, Indonesia karong Hulyo 12-24.