Bag-o pa gani nga giproklamar si Davao City Mayor Sara Duterte-Carpio, daw sa nagsugod na gilayon sa iyang responsibilidad isip ikaduhang labing gamhanan nga tawo sa Pilipinas.
Pormal nang gipahibawo nga si Vice President-elect Duterte-Carpio nakiglambigit na sa buhatan nga gihuptan karon ni Vice President Leni Robredo ug kang Education Secretary Leonor Briones aron sayon na lang sa iyang paglingkod sa umaabot Hunyo 30 ning tuiga.
Niadtong Biyernes, ang anak ni Presidente Rodrigo Duterte nitambong sa moving up ceremony sa San Carlos City, Pangasinan diin siya ang nahimong proxy isip inahan ni Angel Mae Tayaba, kinsang inahan niini usa ka overseas Filipino Worker (OFW).
Si Tayaba, dihang nangampanya si Sara sa ilang dapit, iyang gipadalhan nig suwat nga naghangyo nga kay tua man sa gawas nanarbaho ang iyang inahan, mamahimo ba nga siyay mohulip sa iyang mama nga maoy mouban niya sa stage.
Ning kaaktibo karon ni Inday Sara nga wa pa gani matapos iyang responsibilidad isip mayor sa Davao City, wa ba kaha kini nagpasabot nga nangandam na siyag sugod aron kuhaon ang labing taas nga pwesto nga gihuptan karon sa iyang amahan?
Hinuon angay pa niyang mapatud-an ning tanan sa higayon nga pormal na siyang molingkod sa katungdanan. Kon maayo man gani ang iyang labok uban ning umaabot nga bag-ong administrasiyon, di kahibudngan nga may laing Duterte ang mobalik sa MalacaƱang sama sa mga Macapagal, Aquino ug karon Marcos. (josephelvirtubilan@gmail.com)