Patay nang napalgan ang usa ka ulitawo nga nagdulog sa iyang motorsiklo sa kimba sa dan sa Sitio Kampatoc, Barangay Dalid, lungsod sa Tabuelan, amihanang Sugbo alas 3:00 sa hapon sa Dominggo, Mayo 29, 2022.
Ang biktima si Renerio Pañarez, Jr., 26, ulitawo, taga Purok, Romahan, Brgy. 8 sa lungsod sa Tuburan.
Si Police Staff Sgt. Jerome Millior, imbestigador sa Tabuelan Police Station nga nahinabi sa Superbalita Cebu, niingon nga ang biktima gikan sa Barangay Lubo sa lungsod sa Sogod, diin siya nagtrabaho.
Nananghid niadtong Sabado sa alas 10:00 sa gabii nga mopauli.
Sa pagka alas 3:00 sa hapon Dominggo, usa ka menor de edad naglakaw sa nahisgutang lugar subay sa daplin sa karsada nga dunay riprap ug nakita ang biktima nga naghayang tupad sa motorsiklo.
Nagtuo ang bata nga natulog lang ang biktima apan natingala nga nagkadugo kini.
Gisulti niya sa mga kabanay ug mga silingan nga dunay usa ka wa mailhing tawo sa daplin sa karsada.
Sa imbestigasyon sa kapulisan walay foul play ang kamatayon ni Pañarez.
Gidasunan sab kini sa report ni Dr. Marlo Therenz Marzan sa tambalanan sa Tabuelan, nga ang biktima nakaangkog daghang kadaot sa kalawasan gumikan sa disgrasya.
Ang pamilya sa biktima kunbinsido sab nga nadisgrasya.
Nipirma sila og waiver nga dili na nila ipa-autopsy ang lawas.
Ang maong area mingaw kaayo, walay balay.
Gituohan nga nahagbong ang biktima uban sa motorsiklo ug wala dayon nakit-i tungod sa kaawaw sa dapit hinungdan nga nakabsan sa kinabuhi.