Limpyo ug hapsay ang piniliay sa Mayo 9, 2022 sa lungsod sa Pinamungajan sa habagatan-kasadpan sa lalawigan sa Sugbo.
Mao kini ang giklaro ni Atty. Jerome Brillantes, Cebu Province Election Supervisor, subay sa pagduso og election protest sa korte alang sa pag-recount sa mga balota ang nikandidato pagka mayor sa milabay nga eleksiyon sa naasoy nga lungsod.
Si Salipada “Liplip” Cerna, kinsa napildi sa eleksiyon, nisang-at sa iyang reklamo diha sa Regional Trial Court (RTC) sa Dakbayan sa Toledo.
Gitinguha ni Cerna ang pag-ihap og balik sa mga balota ingon man usab ang pagbasura sa proklamasyon ni Jecjec Baricuatro, kinsa giproklamar nga mananaog nga mayor sa lungsod.
“We were able to peacefully conduct the election in Pinamungajan and then we were able to declare a winning candidate so there’s no such thing as failure of election,”matod ni Brillantes sa Mayo 30.
Gipasabot ni Brillantes nga duna hinuoy katungod nga moduso og petisiyon ang mga napildi.
“Iya nang allegation they have to prove it and its their right,”matod ni Brillantes.
Gidugang usab niya nga ang mga petisyon alang sa recount sa mga nikandidato dili na bag-o sanglit base sa mga nilabayng piniliay duna na sa’y uban nga miduso sa ilang hangyo.
“Sa previous elections naa man gyuy aggrieved parties nga mo-file so dili na siya foreign sa amoa. Actually, daghan na nga mo file gyud but definitely wala man gyuy na reverse,” dugang niya.
Si Cerna nga nidagan ubos sa partidong Promdi napildi og 1,964 ka botos batok ni Jecjec Baricuatro ubos sa One Cebu party.
Si Cerna nakakuha sa 19,343 votes samtang si Baricuatro nakakuha og 21,307 votes gikan sa mga konstituwente niini.