Libkason na sa Metropolitan Cebu Water District (MCWD) ang suspensiyon sa pagproseso sa water service application gikan sa Barangay Busay, Lahug, Apas, Camputhaw ug Capitol Site kon ang Lusaran Bulk Water Project magsugod na sa paghatod og 15,000 cubic meters nga tubig kada adlaw sa Septiyembre karong tuiga.
Ang mao nga mga barangay apil sa giklasipikar nga ‘suspended’, nga nagpasabot nga ang pagproseso sa tanang aplikasyon alang sa koneksiyon sa serbisyo sa tubig temporaryo nga gihunong tungod kay walay igong suplay nga makaserbisyo sa kasamtangang panginahanglan sa tubig.
Ang paghuman sa proyekto sa Lusaran nagpasabot usab nga makasugod na ang water district sa pagserbisiyo sa dili mominos walo ka bukirang barangay sama sa Budlaan, Pulangbato, Binaliw, Agsungot, Guba, Cambinocot, Lusaran ug Paril. Ang water district nag-finalize na karon sa detalyado nga disenyo sa engineering design sa linya sa pag-apod-apod alang sa mga lugar ug sa dili madugay i-bid ang proyekto.
Ang Lusaran Bulk Water Project gihatagan og award sa JE Hydro and Bio-Energy Corp. niadtong Marso 4, 2021.
Nagkuha kini og tubig gikan sa Lusaran River ug naggamit sa naandang paagi sa pag-atiman sa tubig.
Ang MCWD nagtukod og reservoir sa Busay aron mapundohan og tubig gikan sa Lusaran bulk water project, nga iapud-apod sa mga konsumidor sa Lahug, Apas, Camputhaw ug Capitol Site.
Ang pagpalit sa suplay sa tubig gihimo pinaagi sa competitive bidding ubos sa Republic Act (RA) 9184 o Government Procurement Reform Act.
Gidoble sa MCWD ang ilang paningkamot sa pag-establisar og dugang tinubdan sa tubig aron matubag ang kal-ang tali sa suplay ug panginahanglan sa mainom nga tubig sa Metro Cebu.
Karong bag-o, giaprobahan sa MCWD Board of Directors ang rekomendasyon sa management sa paghatag og Original Proponent Status (OPS) ngadto sa Vivant Hydrocore Holdings Inc., nga nisumiter og unsolicited proposal alang sa supply ug delivery sa 30,000 cubic meters nga desalinated water kada adlaw sa Liloan nga himuon pinaagi sa joint venture agreement.
Gisugdan na sa water district ang proseso sa bidding sa pagpalit og desalinated water gikan sa planta sa Cebu City South pinaagi sa competitive bidding ubos sa RA 9184 o ang Government Procurement Reform Act. (gikan sa PR)