Lalaki nga gituohang gi salvage sa lungsod sa Consolacion niadtong Sabado, Mayo 28, 2022, nailhan na pinaagi sa tattoo sa iyang dughan.
Ang amahan sa biktima nipasangil nga gi pick up og pulis ang iyang anak sa Barangay Tisa sa miaging semana ug sukad niadto wa na igkita.
Apan Cebu City Police Office (CCPO) walay record nga aduna silay gidakop nga tawo sa Brgy. Tisa sa miaging semana.
Giila ang biktima nga si Eric Abarilla, hingkod, taga Brgy. Tabok, siyudad sa Mandaue, apan lumad nga taga lungsod sa Moalboal, habagatang kasadpan sa probinsya sa Sugbo.
Ang miila kaniya mao ang iyang amahan nga si Patrocinio Quiboquibo Jr., kinsa nanawag sa usa ka sibyaanan, base sa tattoo sa dughan niini.Giingong katapusan nga nakit-an ang iyang anak sa Brgy. Tisa, Dakbayan sa Sugbo sa miaging semana, apan giingong gi pick up sa mga pulis.
Matod niya nga nagmotorsiklo ang gituohang tulo ka mga pulis. Apan matod ni Police Lieutenant Colonel Janette Rafter, deputy city director for operations sa CCPO, nga wala sila nakadawat og report nga adunay nadakpan ang Labangon Police Station, diin ilang jurisdiction ang Tisa, o ba kaha laing unit nga adunay ngalan nga Eric Abarilla.
Nipasabot si Rafter nga kon adunay madakpan ang matag police station, ipatik gyud sa blotter ang insidente ug unsa nga matang sa kaso ang iyang gikalambigitan.
Dili usab mahitabo nga makagawas kini ug mapalgan nga patay na sa laing lugar tungod kay dako kining tulubagon kon mahitabo. “Pagdakop gani as soon sa paggunit nimo sa imong dinakpan, diretso gyud na sa prisohan,” matod ni Rafter.
Ang Consolacion municipal police station niawhag sa nagpailang amahan ni Eric Abarilla nga mobisita sa ilang buhatan aron mapaubos nila sa back ground investigation ang biktima.
Si Abarilla napalgang patay sa Barangay Sacsac, bukirang dapit sa Consolacion, nga giputos ang nawong og duct tape, dunay duha ka mga samad pinusilan sa agtang ug likod sa ulo, gigapos ang duha ka mga kamot. Mga tawo sa dapit nakadungog og duha ka mga buto sa pusil mga alas 2 pasado sa kaadlawon sa Sabado.