Aduna nay persons of interest ang kapulisan sa siyudad sa Sugbo sa duha ka mga kasong pagpamusil patay sa Dominggo sa buntag, Mayo 29, 2022.
Matod ni Police Lieutenant Colonel Janette Rafter, deputy director for operations sa Cebu City Police Office, nga ang suspek sa pagpamusil sa sitio Mahayahay, Brgy. Guadalupe ila nang nailhan.
Usa ka alyas Nickie ang gitumbok, diin ang anggulo nga ilang gisubay mao ang illegal nga drugas. Giila na usab sa kabanay ang biktima nga mao si Jonas James Cabijar, taga Sambag 1, Dakbayan sa Sugbo.
Ang Guadalupe police station mopasaka nag kaso sa korte kon makompleto na nila ang mga ebedensya.
Samtang sa pagpamusil sa Barangay Carreta diin ang biktima mao si Rexter Leonardo Añora, taga sitio Negative, nailhan na usab nila ang suspek.
Wala lang una mohatag og dugang detalye si Rafter sanglit padayon pa ang ilang imbestigasiyon.