Dul-an sa P100 million nga balor sa illegal nga drugas nga nasakmit sa Philippine Drug Enforcement Agency PDEA 7 ug sa kapulisan sa Central Visayas gisunog nga dunay pagtugot sa korte pinaagi sa thermal facility sa Cosmopolitan Funeral Homes sa dalan Junquera, dakbayan sa Sugbo.
Ang labing daghan niini mao ang methamphetamine hydrochloride kun shabu nga motimbang og 13.3 kilos nga mokantidad og kapin sa P90,738,649.20, mokabat sa 74 kilos nga pinaugang dahon sa marijuana nga mobalor og kapin P8,885,700 ug ang ephedrine nga motimbang og 4.4 kilos nga adunay balor nga P7,097.60.
Sa wala pa kini sunoga, subling gipakita sa PDEA 7 nga gisaksihan sa mga opisyal sa korte, PNP, barangay officials lakip na mga sakop sa media ug gisusi pinaagi sa mga chemist niini, kon tinuod ba nga drugas ang ilang sunugon.
Matod ni PDEA 7 Director Levi Ortiz nga ang ilang gipangsunog mao kadtong aduna nay kamandoan sa korte nga nagdagan na ang kaso nga kinahanglan nga sunugon.
Kini na ang ika walo ka higayon nga pagsunog sukad gisugdan sa gobyerno ang gubat batok sa illegal nga drugas sukad sa paglingkod ni Presidente Rodrigo Duterte sa 2016.
Si RTC Branch 21 Executive Judge Pamela Baring-Uy nga maoy pinasidunggang dinapit nagkanayon nga matag adlaw adunay kapin sa 100 ka kaso sa illegal nga drugas ang masang-at sa korte, diin sa usa ka buwan liboan ang madakpan ug ikiha tungod sa ilang pagka lambigit sa illegal nga drugas.
Nagpasabot kini nga ingon ana ka dako ang problema sa illegal nga drugas sa nasud nga kon wala pa hatagi og pagtagad sa kasamtangan nga gobyerno, mas dako pa nga problema ang sagubangon.
“Araw-araw na lang po mayrong kaso ng droga na sinasampa sa husgado. Average 100, sa akin nalang po everyday na ra-raffle sa akin ay 100 to 150 a day, so imagine nyo po in a month thousand..,” matod ni Baring-Uy.
Ning pagsunog sa kinilo nga illegal nga drugas gidayeg ni Baring-Uy, ang kapulisan ug PDEA 7 nagpakita nga ang gobyerno seryoso sa pag batok sa illegal nga drugas.
Dako matod pa ang epekto kon padayon nga mokuyanap ang illegal nga drugas sa nasud sanglit mosaka ang krimen nga maghatag og peligro sa kabataan, lakip na ang pagka guba sa daghang pamilya.
“This event be a motivation, an inspiration and a thriving force for us to remember our duty and responsibility to our country and to our people to ensure that this country is a safe and secure place to each and everyone of us to live and thrive in, with that congratulations..,” dugang ni Baring-Uy.
Hugot usab nga gihimakak ni Ortiz ang mga pagduda sa mga netizen nga ang walay hunong nga pagkuyanap sa illegal nga drugas tungod kay ang supply nga nadakpan sa kapulisan ug sa PDEA gipang recycle o gibalik ra sa karsada.
Matod niya nga imposible kini nga mahitabo sanglit ang butanganan sa ebedensya dili basta-basta maablihan tungod kay aduna kini tulo ka yawe nga gihuptan sa tulo ka mga tawo.