Di unta ko motuo sa giingong karma pero ang nahitabo sa usa ka board member, mora’g usa ka nindot nga ehemplo sa karma.
Sa nagkaduol ang piniliay sa Mayo 9, dihay nangutana sa board members kon mag-session ba sila pagka Mayo 17.
Abtik kaayo mitubag ang usa ka board member nga angay mag-session aron makita kon kinsay mihilak kay napildi. Sa Iningles pa, cocky kaayo ang maong bokal. Pwede pod nga matawag og tactless.
Klaro kaayo nga sa iyang paminaw, segurado gyod nga modaog siya, kay kon naghuna-huna pa siya nga mapildi, di gyod to siya moboluntaryo og pagawas sa maong mga maidlot nga mga pulong.
* * *
Unsay nahitabo human sa canvassing?
Napildi ang bokal nga hambogero ug napulihan sa iyang posisyon. ‘Tamjun’ na lang siya o taman na lang sa June (30).
Abtik kaayo mipalabtik ang iyang mga kontra nga na-karma si bokal nga hambogero.
* * *
Niay mayora nga midagan pagka-kongresista kay gipasaligan sa gobernador nga tagaan og 50 milyones pesos nga magamit sa kampanya.
Human tambagi sa iyang amahan nga hunongon na ang iyang kampanya kay segurado nga mapildi siya kay nagkadaghan ang iyang mga kontra, wala na manghatag ang gobernador sa iyang gisaad nga mga ayuda.
Ug mao kini hinungdan nga wala madawat ni Mayora ang 50 milyones ka pesos alang sa kampanya.
Resulta – napildi si Mayora kay gamay ra iyang undo, gikopras pa gyod ang iyang mga inangayan.
* * *
Samtang nagpaabot nga mahuman ang iyang termino karong Hunyo 30, giingong nagdali-dali siya og panawag sa contractors aron dalion nila og trabaho ang mga proyekto sa lungsod unya makakobra na pod siya sa iyang kobrahonon o komisyon.
Apan nabantayan kini ug maoy hinungdan nga wala na mo-release og kwarta ang mga contractors kay gusto nila nga ang bag-ong mayor sa lungsod mao nay mopatigayon sa mga proyekto.
Kay na-basted man, naghuna-huna na sab og laing gimik ang mayora.
* * *
Nakahunahuna siya nga molansad na lang pagka kapitan sa ilang barangay aron kuhaon niya ang pagka presidente sa ABC sa lungsod aron makalingkod siya sa sanggunian.
Nagtuo siya nga ang iyang mga kaabag nga mga kapitan sa mayor pa siya, padayon nga mosuporta kaniya.
Susko kay nahibaw-an man sa kasamtangan nga congressman ang plano sa mayora.
Unsay mahitabo?
Kusganon nga misulti ang congressman nga pakontrahan niya ang mayora sa iyang barangay ug andam siya mogasto sa kaatbang niini aron maseguro nga mapildi gyod ang mayora sa iyang plano nga mag kapitan.
Unsay hinungdan nga init man gihapon ang politika sa maong lugar?
Simple lang.
Tungod sa pagka hambogero sa mayora, sinako nga kwarta, binarko nga kwarta nga ipabaha sa distrito aron maseguro ang iyang kadaogan, gawas pa sa mga personal nga batikos batok sa congressman, nakahuna-huna ang congressman nga tagaan og leksiyon ang Mayora. Mao nay premyo sa pagkahambogera.