Napaig ang 9, anyos nga batang babaye human sa pag-ulbo sa sunog alas 5:50 sa buntag Martes, Mayo 31, 2022 sa Sitio Sangi, Barangay Sta. Lucia, lungsud sa Asturias.

Ang biktima mao si Shelby (di tinuod nga ngan), taga Sitio Guinabasan, Barangay Tubigagmanok sa nahisgutang lungsod. Ang tinuod nga ngan sa biktima gipugngan ning mantalaan aron protektahan ang iyang mga igsuong menor de edad.

Gituohan nga ang 9-anyos mangawat unta, apan naratol hinungdan nga na-trap sud sa tindahan. Tulo ka mga establisemento ang nangaugdaw nga gilangkuban sa Palawan Express, Sophies Bakeshoppe, ug Smileys store.

Ang sunog mibilig danyos nga P270,000.

Si Police Staff Sgt. Ervin Jugarap, imbestigator sa Asturias Police Station nga nahinabi sa Superbalita Cebu, nagkanayon nga giisa sa BFP-Asturias ang sunog sa first alarm.

Napawong ang sunog alas 6:40 sa buntag, diin ang BFP- Asturias, kapulisan ug mga residente sa lugar nagtinabangay pagpawong sa kayo.

Matud pa ni Jugarap nga dihang ilang nadawat ang impormasiyon, wa sila maglangay uban sa BFP-Asturias, dali silang ningresponde.

Apan sa ilang pag-abot, dako na kaayo ang kayo ug paspas nga nikatap sa tulo ka mga establisemento.

Nasuta nga dunay usa ka bata ang gisuwayan sa pagsalbar sa mga silingan kay na trap sulod sa Smileys Store.

Sa pagsusi nila uban sa BFP-Asturias, napaig na ang bata.

Positibo kining giila sa iyang maguwang nga 15 anyos ingon man sa mga silingan nga nisuway sa pagsalbar.

Sumala pa ni Jugarap nga si Shelby sayo nga nilakaw gikan sa ilang balay.