Ciar: Battle of the bands,pagbisita ni Steff sa Dragon Fruit

Nakakaon na ba ang tanan?

Padayon ang pagsaka karon sa popularidad sa amihanang bahin sa bukirang barangay sa Cabadiangan, Liloan tungod sa ilang Dragon Fruit Farm nga usa na ka tourist attraction.

Gidayo ni dili lang kay presko ang lugar ug super yummy ang ilang Dragon Fruit shake (P70) nga naghatag og daghang benepisyo sa panglawas kundi tungod usab sa ilang mga kalingawan.

“Last April we had our first Battle of the Band grand finals nga nadaug sa “Bulhot” (first prize), “The Blitz” (second) ug Dragon Fruit Band (third). We gave a total cash prize of P22,000 to all the winners. It’s easy to observe health and safety protocols here since our place is open-air and very spacious,” matod ni Gumero "Mhy" Cogal, ang tag-iya sa Mhy J’s Refreshment and Dragon Fruit Farm sa interbyu sa Superbalita Cebu.

Sa miaging buwan gi-tour ni 2021 Miss Universe Philippines second runner-up Steffi Pearson Aberasturi ang maong farm isip kabahin sa tourism campaign ni Liloan Mayor ug incoming Tourism secretary Christina Garcia-Frasco sa maong lungsod.

“Lami kaayo ilang dragon fruit shake. Perfect gyud siya guys,” paambit pa sa Facebook video post ni Steffi, kinsa usa usab ka proud Liloanon.

“Naa silay siopao, siomai and at the same time duna silay lami nga empanada which is very special. You know why? Nakakita mo sa ilang empanada it’s color red. It’s because mixed ni siya with dragon fruit. Also, inside duna siyay dragon.... fruit,” dayong bahakhak sa beauty queen.

Ang Dragon Fruit Farm dunay gilapdon nga 8,006 square meters nga giugbokan sa 1,380 ka mga poste nga maoy naghupot sa mga tanum sa dragon fruit nga nailang adunahan sa antioxidants ug fiber nga makapalig-on sa immune system.

“Mas tam-is, mas lami ug mas nipis ang panit sa among bunga kay hinog gyud siya sa punoan as in fresh from the farm kumpara sa uban nga hilaw pa gi-harvest mao nga baga ang ilang panit,” dugang ni Mhy Cogal nga 17 katuig nagtrabaho sa Canada isip kanhi Information Technology specialist.

“While tua pa ko sa Canada sige na gyud kog hunahuna unsay maayong negosyo until nakakita kog show sa TV nga Agri Business bahin sa dragon fruit. Self-study ra then nag-hire kog mga farmer. Ako ning gi-open pag-April 2018. Ang mother plant namo sa Mindanao nakapasar for export quality.”

Si Cogal gikan sa pamilyang “Ka Santos” nga lumad ug nailang yutaan sa Barangay Cabadiangan ug ang luna nga nahimutangan sa Dragon Fruit Farm maoy iyang napanunod gikan sa iyang mga ginikanan.

Ang farm bukas 9 a.m.- 6 p.m. (weekdays) ug 7 a.m.- 6 p.m. (weekends). Duna ni entrance nga P20 (weekdays) ug P50 (weekends) apan libre ra sa bikers. Ang farm dunay gilay-on nga 20 minutos gikan sa Poblacion, Liloan.

“Among our amenities include an outdoor playground for kids, a viewing deck, a mini bar and kubo. Our restaurant is open only on weekends because our cook also works as chef for a 5-star hotel. We are still trying to improve the place to make it more fun and tourist-friendly.”

Alang sa dugang impormasyon ug update bisitaha lang ang ilang Facebook page nga Mhy J's Refreshment and Dragon Fruit Farm.