Human sa kapin sa 15 ka mga tuig nga pagduwa sa Philippine Basketball Association (PBA), nakadesisyon si Brgy. Ginebra Gin Kings forward Joe Devance nga moretiro na.
Sa iyang Instagram post, gibutyag ni Devance nga sulod na sab sa 30 ka mga tuig nga nagduwa siya og basketball sa kinatibuk-an ug alang kaniya, panahon na aron magtutok siya sa iyang pamilya.
“I’m sad to say that now is the time to call it a career. I gave the game of basketball my body, mind, and soul everything I had. Now is the time to focus on my kids and family,” caption ni Devance sa iyang post.
Gipasalamatan ni Devance ang iyang pamilya, nakaubang mga basketbolista ug coaches ug ang fans sa pagsuporta sa iyang karera.
“I have said it before and I’ll say it again I am BLESSED!!!” dugang ni Devance.
Unang nakataak si Devance sa PBA niadtong 2007 ubos sa kampo sa expansion team Welcoat Dragons dayon mibalhin siya sa Alaska Aces, Purefoods Hotdogs ug Brgy. Ginebra.
Sa iyang pagbiya, bawon ni Devance ang 12 ka mga titulo ug usa ka grandslam title.