Ang Anti-Kidnapping Group (AKG) Visayas Field Unit nakakuha og pipila ka mga pangalan nga gituohang master mind sa pagdagit sa 70 anyos nga negosyanteng Intsek, diin ilang napatay sa engkwentro ang upat ka mga suspek sa ronda sa dakbayan sa Lapu-Lapu sa Lunes sa gabii, Mayo 30, 2022.
Matod ni Police Lieutenant Zosimo Ravanes, deputy chief sa AKG 7, nigawas base sa komunikasyon sa cellular phone sa upat ka mga Chinese nationals nga napatay sa engkwentro apan wala pa nila masayri kon naa ba kini dinhi sa Pilipinas nakabase.
Nakig-alayon na sila sa Chinese Consul sa Sugbo ug sa embahada sa China alang sa himuon nga background investigation uban sa mga awtoridad sa maong nasud.
“Naa man tay ni pop-up nga mga ngan base sa ilang mga communication pero wala pani sila nato ma locate kon asa ni sila nakabase so far,” matod ni Ravanes.
Miabag usab kanila ang Interpol sa background information sa upat nga namatay ug duna na silay inisyal nga gihatag sa kapulisan.
Gitug-an ni Ravanes nga sa mosunod nga mga adlaw adunay mangabot sa Sugbo nga mga personnel sa AKG gikan sa kaulohan aron motabang sa imbestigasiyon.
Sanglit ilang itandi ang mga kaso sa kidnapping didto sa Luzon nga naglambigit gihapon sa mga Chinese national kon aduna ba kini kalambigitan ug ilang ipakita ang hulagway sa upat nga suspek nga namatay.
Sa upat ka suspek, usa niini trabahante sa biktima sa iyang negosyo isip financier sa pagtukod og daghang mga building sa Mactan Newtown nga mao si si Gong Jinming.
Gituohan ni Ravanes nga mao kini ang naggiya sa mga kidnapper sa panimay sa biktima.
Si Gong Jinming maoy person of interest usab niadtong usa ka Chinese national nga nahulog sa building sa Mactan Newtown sanglit sila ang nagkauban nga nag-inom sa usa ka kwarto sa maong building.
Ang tulo ka suspek nasuta nga magbisitahan kini sa Sugbo sa milabay nga mga buwan aron dinhi manugal sa casino ug online gambling nga usa sa hinungdan sa pagpanagit niini sa sama nila nga Chinese.
Samtang giangkon ni Ravanes nga sa dihang nahitabo ang ikaduhang pagpangidnap sa usa ka negosyanteng Intsik nabalaka na pag-ayo ang Chinese Consul nga nag base sa Sugbo.
Tungod niini, hugot ang gihimong monitoring sa ilang mga opisyal sa lakaw sa imbestigasyon sa kapulisan ug nalipay lang kini sa dihang nasulbad ang duha ka mga kaso bisan ila rang kaubang Intsik ang naghimo sa krimen.