Pakistani national nasikop sa entrapment operation

Usa ka Pakistani national gidakop sa Criminal Investigation and Detection Group (CIDG) Lapu-Lapu City Field Unit pinaagi sa entrapment operation sa kasong estafa.

Ang suspek giila nga si Shabbir Bhatti, taga Purok Sunlight, Barangay Babag 2, Siyudad sa Lapu-Lapu.

Matod ni Police Captain Nigel Sanoy, hepe sa CIDG Lapu-Lapu, nga nireklamo sa ilang opisina ang negusiyante nga taga Dipolog City sa Mindanao human sila giiingong nabiktima ni Bhatti.

Gisaysay niini nga niadtong Disyembre 2021 sa wala pa moigo ang bagyong Odette, nag post si Bhatti sa online Marketplace nga aduna siyay ibaligya nga Isuzu Elf truck nga mobalor og P300,000.

Tungod kay interesado ang negosyante nga si Richard Aguilar, gitawgan niya ang contact number sa nag deal sa sakyanan.

Atol sa ilang transaction, giingong gipabayad si Aguilar og P100,000 isip downpayment samtang ang balanse ihatag kon makuha na ang sakyanan.

Apan niabot na lang ang Mayo 2022 wala moabot ang ilang sakyanan hinungdan nga gi-contact na usab niya kini aron i-follow up kon asa na ang gipalit nga sakyanan.

Inay nga ihatag ang sakyanan, gipangayoan na usab siya og P15,000 alang sa pag repair sa electrical wirings. Dinhi na nagduda si Aguilar.

Nilarga siya paingon sa Sugbo ug nidiretso sa buhatan sa CIDG Regional Field Unit 7 aron moduso og reklamo batok sa Pakistani national.

Niadtong Mayo 27, 2022 uban ang CIDG Lapu-Lapu City Field Unit, nilusad og entrapment operation sa shop sa suspek sa Barangay Babag 2 nga niresulta sa pagka sikop niini.

“Online transaction rana sila, Sir. Gipadala ra ang kwarta sa Pakistani nga P100k downpayment daw to sa Elf nga gi order. Mao to nireklamo nasad sila kay gipangayoan na pud silag P15K for wiring daw. Instead nga ibalik sa ilaha ang kwarta nangayo pa hinuon og additional,” matod ni Sanoy.

Gibutyag ni Sanoy nga adunay shop sa sakyanan ang suspek apan wala na kini sakyanan nga ibaligya kay nalugi sa negusiyo human naigo sa bagyo.

Human masikop si Bhatti, laing reklamante ang nidangop sa CIDG Lapu-Lapu nga nabiktima usab siya sa Pakistani national.

Nagpaayo matod pa kini sa aircon sa iyang sakyanan diin gipabayad siya og P8,000 apan sa pagbalik niini pila ka adlaw wala na ang iyang sakyanan.

Gawas sa kasong estafa nga atubangon ni Bhatti, ikiha usab siya og carnapping

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph