Panday nga wanted sa kasong kidnapping ug pagpatay sa 6 anyos nga bata nasikop sa kapulisan sa iyang gitrabahoan sa Barangay Canduman, dakbayan sa Mandaue, alas 3:45 sa hapon sa Martes, Mayo 31.
Ang nasikop mao si Allan Nacorda Gemongala, 48, dunay kapuyo, mason, taga Sitio Coles, Barangay Quiot, dakbayan sa Sugbo.
Si Police Major Janilito Marquez, hepe sa Labangon Police Station nga nahinabi sa Superbalita Cebu, nagkanayon nga si Gemongala, number 3 sa most wanted persons sa Region 7, nagtago-tago sulod sa walo ka tuig
Ang kaso niini niadtong 2013 mao ang iyang pagdagit sa 6 anyos nga bata nga ilang silingan.
Ang suspek maoy gitumbok nga nidala sa bata pero kalit nga nahanaw. Dunay mga saksi nga nitumbok kang Gemongala.
“Ang bata daw gihaylo niyag daghang candy gidala sa ilang panimalay, unya nahanaw,” dugang ni Marquez.
Human sa pipila buwan, bukog na nga napalgan ang bata 200 metros gikan sa balay sa suspek.
Ang suspek nikagiw, nagbalhinbalhin og lugar sa dakbayan sa Lapu-Lapu ug Mandaue.
Naggamit siyag mga alias sa iyang trabahoan sa pagtago sa iyang pagkatawo. Si Marquez nibutyag nga dunay nakahatag nila og impormasiyon kabahin sa suspek.
Ang tracker team sa Labangon Police Station wala maglangay, daling nisubay sa usa ka junkshop sa Mandaue, diin si Gemongala nagtrabaho.
Ang suspek nga nahinabi sa Superbalita Cebu hugtanong nanghimakak sa pasangil batok kaniya.
Gipadayag niini nga siya giduot sa iyang mga gikainom kaniadto pero nahadlok siya sa iyang seguridad hinungdan nga nilayas sa ilang lugar. Matud ni Marquez, nga ang suspek idlas kaayo sanglit makadaghang higayon nakaipsot.
Ang suspek nasikop pinasikad sa warrant of arrest nga giisyu ni Judge Manuel D. Patalinghug, sa Regional Trial Court (RTC) 7 Branch 22 sa Dakbayan sa Sugbo nga gipetsahan og June 26, 2014.