Kapulisan sa dakbayan sa Sugbo nipahugot pa sa ilang pakig-alayon sa pagpaniid sa labina sa komunidad sa mga Muslim sa Sugbo human sa duha ka dungan nga pagpamomba sa Mindanao sa miaging adlaw.
Subling gipahibawo sa kapulisan sa dakbayan nga wala sila makadawat og direktang hulga sa seguridad human sa duha ka dungan nga pagpamomba sa Maguindanao apan wala sila mokompiyansa.
Ang Police Regional Office (PRO) 7 nipagawas og kamandoan sa tanang city ug provincial police offices nga pahugtan ang pagpatuman sa seguridad sa ilang tagsa-tagsa ka hurisdiksiyon labi na sa vital installations, inspeksiyon sa mga lugar nga daghang tawo sama sa pantalan, bus terminal lakip na ang mga dagkong mall ug simbahan.
Matod ni Police Major Jose Angelo Acupinpin, hepe sa operations branch sa Cebu City Police Office (CCPO), kini nga mga dapit maoy posibling target sa mga teroristang grupo.
Dugang ni Acupinpin nga aduna usab silay gilusad nga information drive sa security officers diin ilang edukahon unsaon pagtubag kon adunay madawat nga hulga sa bomba sa ilang gibantayan nga edepisyo.
Aduna silay mga hotline number nga gipanghatag sa mga security officer nga mamahimo nila nga matawgan kon adunay mamatikdan sa ilang pwesto.
Gibutyag ni Acupinpin nga gipalambo nila ang ilang pakigsandurot sa Muslim leaders sa dakbayan sanglit aduna man silay tigum nga himuon matag buwan.
Nipasalig ang Muslim community nga motabang sila sa pagpahibawo kon adunay mamatikdan nga dayo gikan sa Mindanao aron mapaubos sa background investigation.