Nagtuo si Gobernador Gwendolyn Garcia nga mohayag ang kaugmaon sa Sugbo niining mosunod nga katuigan. Tungod kini sa makabungog nga kadaugan nga gihatag sa mga Sugboanon kang President-elect Ferdinand Marcos, Jr, ug Vice President-elect Sara Duterte Carpio pinaagi sa One Cebu Party ni Garcia. Labi na gyud kay ang tigpamaba ni Carpio nga si Liloan Mayor Christina Garcia-Frasco, anak ni Gob. Garcia, gitudlo nga Tourism Secretary.
Nagpaabot ang katawhan nga makapahimus ang Sugbo sa paghuman sa proyekto dinhi sama sa Metro Cebu Expressway nga gikan sa Naga City hangtud sa Danao City agi sa kabukiran. Ang 73.75 kilometros nga high standard arterial toll road maoy sulbad sa trapik gikan sa north to south. Mogasto kini og P28 billion.
Dugay na usab kaayong naaprobahan ang Bus Rapid Transit (BRT) Project apan hangtud karon nagpunay pa kini og usab-usab. Ang ika-upat nga taytayan nga magdugtong sa Liloan ug Mactan nahunong ang kalihukan tungod sa pagsupak sa pipila ka mga negosyante sa agian niini.
Kinhanglang ipadayon usab ang Light Railway Transit (LRT) ug ang monorail projects. Manghinaut usab ako nga ang mga opisiyal sa Lapu-Lapu City pinangulohan ni Mayor Junard “Ahong” Chan ug sa iyang kapikas, Kongresista Cindy Chan moproponer na og proyekto sama sa Pier 39 sa San Francisco, USA diin nahimutang ang mga dapit alang sa shopping, dining, entertainment sama sa live shows o mga street performances ug uban pa.
Maghimo lamang sila og project study nga aprobahan sa local development council ug sa Regional Developent Council (RDC) aron kini mahatagan og igong pagtagad sa national government. Posible kini kon maghiusa ang tanan alang sa katumanan niining tanan ug uban pa. Hinaut pang dili nato palabyon kining maong panahon alang sa Sugbo.
Human nang eleksiyon apan wala pa gihapon maghuman ang pinilay sa Senado kon si kinsa ang mahimo nilang Senate president. Nagsugod og upat ka mga mikandidato nga sila si Chiz Escudero, Sherwin Gatchalian, Juan Miguel Zubiri ug Cynthia Villar apan duha na lang karon ang nagpabilin, sila si Zubiri ug Villar. Sumala ni Bato dela Rosa nga gisangonan siya ni Zubiri na makighinabi kang Villar.
Sa samang higayon iyang gipahibawo nga siya, Imee Marcos, Bong Go, Robin Padilla, Bong Revilla, Francis Tolentino ug Mark Villar nagpaluyo kang Villar. Sa ato pa walo pa sila nga layo pa kaayo sa 13 nga maoy gikinahanglan aron modaug.
Ang wala pa masayri kon si kinsa ang paluyohan mao sila si Risa Hontiveros, Escudero, Gatchalian, Joel Villanueva, Raffy Tulfo, Loren Legarda, JV Ejercito, Jinggoy Estrada, Alan Peter Cayetano, Pia Cayetano, Sonny Angara, Nancy Binay, Aquilino “Koko” Pimentel, Grace Poe ug Lito Lapid.
Wa masayri kon adto ba sila mopaluyo kang Zubiri. Apan nganong lisudlisorun pa man gayud kini nila? Nganong dili na man lang pasagdan ang mga senador nga mopili sa ilang lider nga magikan ra man usab kini sa ilang majority group? (mannyrabacal1144@gmail.com)