Tulisan nadakpan human gibunalan og tangke sa LPG sa cashier nga misukol sa tindahan sa Purok Kamonggay, Barangay Poblacion, lungsod sa Compostela, alas 8:45 sa buntag kagahapon, Hunyo 2, 2022.
Giposasan mao si Dioscoro Congcong, Jr., 30, dunay kapuyo ug taga Sitio Colima, Baranay Cotcot, lungsod sa Liloan.
Ang Vhanz LPG retailer, gipanag-iya sa negosyante nga si Rome Rico Espilita Tito, 54, minyo, taga Canamucan II, Barangay Canamucan, Compostela, maoy gitulis.
Samtang, naangol ang cashier nga si Christian Mercado Ochea, 24, ulitawo, taga Barangay Magay, Compostela.
Si Police Lt. Samuel Negro, hepe sa Compostela Police Station nga nahinabi sa Superbalita Cebu, nagkanayon nga si Congcong naglakaw lang kini nga naabot sa maong dapit ug nagdala og .38 revolver nga paltik nga dunay tulo ka mga bala.
Ang cashier nga si Ochea nibutyag nga nakugang siya dihang kalit nga nisulod ang suspek, nanion og armas ug nideklarar dayon og tulis.
Giablihan niya ang drawer ug gihatag ang P23,400 cash.
Samtang nanguha sa kwarta ang suspek, kalit nga nidagan ang cashier ug gi-lock ang pultahan.
Ang suspek naratol, wala makapabuto sa armas ug nahitabo ilang nilayugay sa duha.
Ang cashier nakakuha sa LPG tank ug gipuspusan niya si Congcong.
Ang suspek nabangog apan nakadagan pa pagawas apan sa iyang kalipong, nagtagak ang kwarta sa karsada.
Ang mga estambay nga nakakita, nitabang sa cashier hinungdan nga nadakpan ug gi-turnover kini sa kapulisan.
Nabawi ang kwarta nga P23,400 cash ug nakuha sab ang armas nga gigamit sa suspek.
Sumala ni Negro, ang suspek niangkon sa krimen gumikan sa kawad-on ug gigutom na siya ug wala nay ikahatag sa pamilya napugos sa pagpanulis.
Kasong pagpanulis, Comelec gun ban ilang giandam batok sa suspek.
Ang Comelec gun ban sa tibuok nasod alang sa miaging eleksiyon sa Mayo 9, 2022, nagsugod sa Enero 9 ug motapos karong Hunyo 8, 2022.