"MAGPAIT na sab."
Kini ang gibutyag sa pipila ka mananagat sa Brgy. 23-C Isla Verde, Boulevard Davao City human nga gipatuman ang tulo ka bulan nga "closed fishing season."
Niadtong Mayo 30, 2022, gipahibalo pinaagi sa culmination sa Farmers Month celebration ang "closed season" sa Davao Gulf nga nagsugod Hunyo 1 padung Agosto 31, 2022.
Sumala sa mangingisda nga si Armand Hepolonia, 45-anyos, taga Purok 5, Isla Verde nga maapil unta sila nga hatagan og ayuda sa kagamhanang lokal gumikan pangisda lamang ang panginabuhian sa iyang pamilya.
"Walay lain, pangisda lang gyod, unta maapil ko sa ayuda, sa una pa gyod wala gyod kami nakita sa gobyerno, unsa naman lang kaunon sa akong pamilya," saysay ni Armand sa Superbalita Davao.
Subay sa Joint Administrative Order (JAO) No. 02 sa Department of Agriculture (DA) ug sa Department of Interior and Local Government (DILG) nga gipirmahan niadtong tuig 2014, nga ideklara ang tinuig nga pagdili sa pagpanagat sud sa tulo ka bulan.
Kini aron nga di matugaw ang pagpangitlog sa mga isda kon spawning season para mahatagan og higayon nga makapadaghan ang mga isda sa kadagatan.
Luyo niini, nagpasalamat si Bureau of Fisheries and Aquatic Resources (BFAR) Davao Region director Raul C. Millana, "Nagpasalamat tayo sa grupo ng fisherfolk officials ng Davao Region, malaking tulong din ang kanilang nagawa sa buong season."
Gipasabot sa BFAR nga puwede man managat apan, gidili ang pagdakop sa mga small pelagic fishes sama sa karabalyas, galunggong, matambaka nga gamit ang bagnets ug ringnets.
"Small pelagic fishes still very dominant in Davao Gulf for calendar year 2021," pagpasabot ni Dir. Millana.
Base sa Republic Act 10654 kun "An Act to prevent, deter and eliminate illegal, unreported and unregulated fishing", gikan sa Republic Act No. 8550, nga mas nailhang "Philippine Fisheries Code of Philippines" ang si kinsa mang masinupakon, makamulta og P20,000 o tugbang sa lima ka higayon sa presyo sa nadakpan nga isda. Alang sa commercial scale pamultahon og P100,000 hangtud P500,000 o tugbang sa lima ka higayon sa presyo sa nadakpan nga isda.
Kauban sa BFAR ang nagkadaiyang ahensiya sa gobyerno lokal man o nasyonal aron masanta ang illegal unreported and unregulated (IUU) fishing sa kadagatan sa Davao sa panahon sa "closed season". (Uban sa PR)