ANDAM na ang Davao City Covid Task Force sa pagtubag sa posibilidad nga moabot sab sa Siyudad sa Davao ang Monkeypox virus.

Kini ang gibutyag ni Davao City Covid-19 Task Force Spokesperson Dr. Michelle Schlosser atol sa pakighinabi sa Davao City Disaster Radio niadtong Miyerkules.

Sumala ni Schlosser nga ang lokal nga gobyerno sa Dabaw duna na'y gitan-aw nga gamitong Covid Cluster Clinics (CCCs) kung anaa na ang sama niini nga kaso sa Dakbayan.

Ang Monkeypox usa ka viral zoonosis o virus nga mabalhin sa tawo gikan sa hayop pinaagi sa respiratory droplets, apan luyo niini mamahimo sab kining makatakod pinaagi sa open wound, body fluids, ug physical body contact apil na paghilawas.

"Ang incubation period niya is from five to 21 days. Ang pinaka-first symptoms niya is fever and swelling of lymph nodes. Some of the patients also with monkeypox naga manifest sila ug headache, chills, sore throat, kakapoy sa lawas and fatigue," ingon ni Dr. Schlosser.

Sa kasamtangan wala pay sama niini nga kaso sa Pilipinas, apan nakita na kini sa Spain, Portugal, ug European Union nga mga kanasuran.