Giingong suway nga pagdagit sa usa ka bata sa brown nga van sa lungsod sa Alegria sa habagatang sa lalawigan sa Sugbo niadtong Huwebes, Hunyo 2, 2022, sa buntag, hugot nga gihimakak sa hepe sa kapulisan sa probinsya.
Nikatap karon sa social media ang giingong suway nga pagdagit sa usa ka babaye nga menor de edad nga tinun-an sa lungsod sa Alegria sa habagatan sa lalawigan sa Sugbo sa usa ka brown nga van.
Dali nga mihimog imbestigasiyon ang kapulisan sa lungsod ug ilang nailhan dayon ang tag iya sa maong sakyanan lakip na ang drayber ug nasuta nga usa diay kini ka tourist van nga adunay gihatod nga guest.
Matod ni Police Colonel Engelbert Soriano, hepe sa Cebu Police Provincial Office (CCPO), walay kamatuoran ang maong taho nga adunay suway nga pagdagit sa bata sanglit igo lang nga na mick up og pasahero ang driver niini nga mobiyahe paingun sa siyudad sa Sugbo aron maka bawi kini sa iyang krudo.
Niangkon usab ang drayber nga iyang nahunongan ang usa ka batang babaye ug gipangutana kon mosakay ba kini paingun sa siyudad apan kalit lang kini, matod pa, nidagan nga sama sa nahadlok.
“Ang result nga initial investigation namin and our interview with the driver walang ganung insidente ng kidnapping,” matod ni Soriano.
Wala hinuon mobasol si Soriano sa bata sanglit na trauma na kini human ang iyang maguwang babaye gisuwayan usab og pasakay sa motor nga wala makaila sa drayber.
Gani ang kapulisan sa maong lungsod misusi na sa maong pangangkon sa maguwang kon kinsa kadtong driver sa motor dungan sa pasalig nga ila kining imbestigaron.
Human sa hitabo, niawhag si Soriano ngadto sa publiko nga kon adunay ingun niini nga insidente, labing maayo nga dili dayon ipublikar sa social media kon dili pa masiguro kon tinuod.
Mo-report sa kapulisan aron mahatagan og dinaliang pagtagad ug mailhan dayon kon kinsa ang naghimo niini.