Ang mga traffic violator sa Mandaue City gipahinumdoman nga tumanon gyud ang pito ka adlaw nga grace period sa paghusay sa ilang mga kalapasan aron dili sikupon, matod sa Traffic Enforcement Agency of Mandaue (Team).
Si Team executive director Edwin Jumao-as nitambag sa mga motorista nga nakahimo og traffic violation sa Mandaue nga mobayad sa ilang pending nga silot sa tukmang panahon aron malikayan nga maisyuhan og bench warrant, matod niini sa pakighinabi sa mga tigbalita sa Huwebes, Hunyo 2.
Ang ilang datus sa Mayo nagpakita nga adunay mga 6,000 ka traffic violators, ug 10% lang niini ang nakaareglo sa ilang mga kalapasan.
Usa sa kasagarang hinungdan nga magpabaya sa paghusay sa ilang mga kalapasan mao nga sagad nila dili seryusohon ang kabalido sa traffic citation ticket (TCT).
“Violators often neglect their penalties because they are only issued a TCC, unlike when they are given TOPs (Temporary Operator’s Permit) in exchange for their driver’s license that will be confiscated,” matod ni Jumao-as sa pakighinabi sa SunStar Cebu.
Ang TCT, lakip ang multa nga kantidad, iisyu sa mga traffic enforcer sa higayon nga ang usa ka motorista makahimo og bisan unsang kalapasan sa trapiko samtang nagmaneho. Sa higayon nga maisyu, ang mga motorista hatagan og labing menos pito ka adlaw sa pagtrabaho aron makabayad sa multa.
Alang sa Mandaue City, ang mga malapason mahimong mohusay sa ilang mga TCT sa buhatan sa Team nga nahimutang duol sa Mandaue City Sports and Cultural Complex.
Si Jumao-as nipahimangno sa mga motorista nga kon mapakyas sa paghusay sa ilang mga kalapasan sulod sa 7 ka adlaw nga grace period, ipatawag sila Mandaue City Prosecutor’s Office..
Ang traffic violators pasakaan og kaso sa paglapas sa City Ordinance 35-2016 o ang pagsunod sa traffic rules and regulations. Unya, isyuhan sila og warrant of arrest ug bisan pag-impound sa sakyanan kon dili gihapon mabayran ang mga silot, dugang ni Jumao-as.
Ubos sa ordinansa, ang mga malapason i-blacklist sa National Bureau of Investigation (NBI) sa higayon nga sila mosulay sa pagproseso sa ilang driver’s license renewal ug mahimong did-an sa pag-angkon og mga serbisyo gikan sa bisan unsang buhatan sa local government unit.
Hinuon, kining tanan matangtang sa higayon nga ma-settle na nila ang ilang mga multa.
Ang makolekta nga bayronon gamiton sa pagpauswag sa serbisyo publiko sa Team ug ubang buhatan sa gobyerno.
Pipila sa naandang kalapasan sa trapiko nga gihimo sa mga motorista nga gipahayag sa TEAM mao ang mga ilegal nga U-turn nga adunay multa nga P500 ug dili pagtagad sa mga traffic signs ug road obstruction nga adunay multa nga Php 1,000.