Human sa pito ka tuig, nahuman ra gyud ang 450 metros nga karsada sa Brgy. Lorega San Miguel nga gigastuhan sa Kagamhanan sa Dakbayan sa Sugbo og P4.5 million.
Niadtong Biyernes sa hapon, Hunyo 3, 2022, gipahigayon ang ceremonial ribbon cutting nga gitambungan nila ni Cebu City Mayor Michael Rama, Barangay Kapitan Fritz Herrera ug mga sakop sa barangay council.
Ang dan San Miguel gisugdan og trabaho niadtong 2015 ubos sa administrasiyon ni Rama.
Apan giingong nahunong ang pagtrabaho niini sa panahon ni kanhi mayor Tomas Osmeña sa 2016, apan giduso og balik ni Herrera sa panahon ni anhing mayor Edgardo Labella.
Si Konsehal Jerry Guardo, chairman sa committee on infrastructure sa Konseho sa Dakbayan, nipasabot nga wala dayon mapahigayon ang ribbon cutting pagkahuman sa maong proyekto kay naabtan sa election ban, nga nagsugod niadtong Marso 25, matod sa Cebu City News and Information portal.
“Subo kaayo gipakatug sugod atong 2016 up to 2019. However, pagka-2019, si Mayor Ed (Labella) ang nahimong mayor ako ning gipaningkamotan og atong gi-revive ang maong pundo ug karon nakita ninyo natapos og naa na ta karon sa actual,” sulti ni Herrera.
Gisugdan ang pagtrabaho sa pagsemento sa dalan niadtong Disyembre 2021.