Grabe sa kadaghan sa mga disgrasya sa motorsiklo sa miaging semana nga ningkalas og mga kinabuhi. Di lang ni dinhi sa Sugbo, apil na sab sa Bohol. Maorag nagtubag ang mga aksidente sa motorsiklo.

Dunay namatay nga babaye sa Transcentral Highway (TCH) kay gituohang wa na makakontrolar sa iyang motorsiklo samtang gadulhog sa Brgy. Cansomoroy. Laing babaye naligsan sab og trak human sila nabangga samtang siya nagsakay og habalhabal padung sa trabaho.

Kapin usab sa semana ang nakalabay, namatay ang usa ka assistant manager human usab nawad-an og brake ang ilang gisakyang motorsiklo uban sa iyang kapuyo ug anak.

Di man tuod mapugngan ang aksidente, apan ang kahigayunan malikayan kon kita magmatngon sa pagmaneho ug atimanon og maayo ang sakyanan.

Sulod sa katuigan nakong pagbiseklita ug pagmotorsiklo, diha nako nakita ang kamahinungdanon sa maintenance sa sakyanan, gawas sa defensive driving.

Usa sa mga mahinungdanon kaayong part sa bisiklita, motorsiklo, scooter ug four-wheeled nga mga sakyanan mao ang brake. Sa two-wheeled nga mga sakyanan, ang kalawom na sa pagkumot maoy timailhan nga hilis na ang pads ug shoe.

Ang kahimtang sa ligid mo-matter pud kay kon hilis, minos na kaayo ni og traction.

Ayaw kalimot sa maintenance sa imong sakyanan kay importante kaayo ni sa kaluwasan sa imong pagpadagan.

DEFENSIVE DRIVING

Apan ang labing dako kaayo og role sa luwas nga pagmaneho mao ang defensive driving. Makaguol lang kaayo kay daghan ang nag neglect niini.

Ang defensive driving nagpasabot nga imong panalipdan ang imong kaugalingon gikan sa mga aksidente, di lang usa, kon di gikan sa daghan pa.

Kon defensive driving ang imong gipraktis, ayaw pagpalabi sa pagpadagan aron makontrolar nimo ang sakyanan kon mo-brake ka na. Biseklita o motorized nga sakyanan, mao ni ang imong angay nga buhaton.

Kanunay kang mag-anticipate sa posibleng buhaton sa mga driver sa mga sakyanan nga naa sa imong atubangan ug kilid. Busa, again, ayaw patakag padagan.

Bantayi ang imong palibot. Tan-awa ang imong side mirror aron makakita ka sa mga sakyanan nga naa sa imong likod.

Tan-awa ang brake lights, signal lights ug ligid sa mga sakyanan nga nag-una. Kon mosiga ang suga sa brake, brake sab dayon. Kon moliko, pagpahinay dayon sa imong dagan. Masayod sab ka kon moliwag ang sakyanan kon moliso ang ligid patuo, o pawala.

Kon naa ka sa crossing o eskina, pagpaminor sa imong dagan aron duna ka pay time sa pag brake kon duna may sakyanan nga motabok.

Tan-awag una ang wala nga side nimo kon mogawas ka og eskina, ayaw sa tuo kay ang unang sakyanan nga magdulong nimo naa sa left side, wa sa tuo.

MAKALUWAS

Pipila lang ni sa tips sa defensive driving apan makatabang kaayo ni sa paglikay sa mga aksidente. Ayaw pagsunod nianang kamote motor riders nga nagtuo nga puthaw ang ilang lawas.

Kon nag-scooter o nagmotorsiklo ka, ayaw palabi sa imong hambog sa banking kay bisan mga professional, usahay masipyat. Unsa na kaha kon bag-o lang kang nakakabayo og two-wheeled motorized nga transport.

Amping ta kanunay.