Nabasa na nako kini sa atong kasaysayan. Nakita na sab nako kining nagkalahi nga panglantaw karong bag-o dihang nagkita ang mga higala ug nag-istorya kabahin sa miaging piliay.
Panglantaw kini sa mga kanhi aktibista pagka batan-on pa ug giunsa nila pag-atubang ang pagdagan ug kadaugan ni Ferdinand ‘Bongbong’ Marcos Jr.
Ikapila na mahitabo kaniadto nga ang mga Pilipino magkalahilahi ang panglantaw kabahin sa pagpalambo sa pakigbisog ug sa pagpalambo sa nasud.
Pananglitan, lahi ang panglantaw nilang Rajah Humabon ug Datu Lapu-Lapu kabahin sa pag-abot ni Ferdinand Magellan. Samtang giabi-abi si Magellan ni Humabon, nisukol ug gipukan ni Lapulapu kini.
Lahi sab ang panglantaw sa mga Katipunero batok sa mga Katsila. Samtang nisukol ug wala molubad silang Leon Kilat ug Luis Flores, lahi sab ang mga lider sa Carcar. Ilang gipatay si Leon Kilat kay di sila gusto mosulong sa ilang lungsod ang mga Katsila.
Pag-abot sa mga Amerikano, natunga ang mga lider sa mga rebolusyonaryo sa Sugbo. Dali kaayong nisurender ang grupo nilang Luis Flores ug Julio Llorente samtang nanukol ang grupo nilang Juan Climaco ug Arcadio Maxilom.
Marcos
Ingon niini nga nagkalahing panglantaw sab ang nakita nako karon sa pagdagan ug atong pag-atubang sa kadaugan ni Ferdinand “Bongbong” Marcos Jr.
Kadto pa lang Mayo 10, 2022, daw awtomatik dayon ang protesta batok sa giingong kadaugan ni Marcos ug kang Inday Sara Duterte-Carpio.
Apan kasagaran sa mga botante batok kang Marcos wala moduyog niini. Ang kadaghanan nihulat sa panawagan ni Bise Presidente Leni Robredo.
Bisan pa man, dakong sayop kon isipon kini nga nidawat na ang mayorya sa maong kadaugan.
31 milyones
Balikbalikon dayon sa administrasyon ug sa mga tigsuporta niini nga moabot og 31 milyones ang nibotar kang Marcos. Apan dako nilang problema nga daghan sab kaayo ang dili motuo niini.
Samot kay gikinahanglan karon sa administrasyon ang suporta sa katawhan tungod sa kadaghan sa mga suliran nga ibilin si Presidente Rodrigo Duterte. Ang giingong the best president sa solar system nagbilin og mga problema nga wala masulbad.
Pananglitan, wa man gyud mapapas ang gidiling drugas ug ang pangurakot. Gani, nisamot kini karon.
Wa man gyud maingon nga napatas ang playing field sa panahon ni Duterte ug kining umaabot nga administrasyon.
Paminaw gud sa mga istorya sa mga tigsuporta, nahurot ilang panahon karon sa pagpangitag paagi nga magamit ang ilang pagsuporta isip pabor nga makaginansya karon.
Mas nakapabor?
Hinuon, sa pagkakaron, interesado ko maniid kinsa man ang mas nakapabor sa mga tawo ni Duterte diha sa bag-ong administrasyon.
Hinuon, mahimo man sab alang sa mga wala makasakay sa kampo ni Marcos Jr. ug ni Inday Sara nga ari mopidpid sa mga nakadaog sa local nga kagamhanan.
Pananglitan, kining wala kaayo makakapyot kang Inday Sara kay nakontrahan, pwede man sab sila makakapyot pinaagi ni Gob. Gwen Garcia.
Kon hunahunaon karon, makaingon kita nga dako kaayo ang gahum karon sa mga Garcia. Samot pa gyud nga gawas sa duha ka kongresista diha nilang Cong. Duke Frasco ug Cong. Pablo John Garcia, itudlo pa gyud nga tourism secretary si Mayor Christina Garcia-Frasco. (DM nako @anol_cebu)