Napaig ang 3 anyos nga batang lalaki human nasunog ang ilang balay alas 8:22 sa gabii sa Biyernes, Hunyo 3, 2022 nga duol ra unta sa fire station sa Barangay Poblacion, lungsod sa Aloguinsan, habagatang kasadpan sa Sugbo.

Gibasol sa mga bombero ang mga tawo sa palibot nga giuna ang Facebook Live kay sa pagpahibawo kanila nga mga 300 metros ra ang ilang gilay-on gikan sa balay nga nagdilaab.

Si Izach Pantin Pielago, 3, wala na matabang sa iyang mga kabanay ug sa mga bombero tungod sa kadako na sa kayo. Nakalingkawas ang iyang mga maguwang nga sila si Michael Richard, 10, ug Rio Jenjie, 8 nga nakuha sa ilang mga silingan.

Si SFO1 Johnmer Lesigues, hepe sa Bureau of Fire Protection ( BFP) sa Aloguinsan nga nahinabi sa Superbalita Cebu nagkanayon nga giisa nila sa 2nd alarm ang sunog.

Nangayo silag abag sa BFP Pinamungajan sanglit nagtapoktapok ang mga balay sa lugar. Sumala pa niya nga ang hinungdan sa sunog mao ang wala mapawong nga tangke sa liquefied petroleum gas (LPG).

Si Lesigues niingon nga ang inahan sa mga bata nga si Ann Marie Alvarado Pantin niasoy nga sa wala pa masunog ilang balay, iyang gisugo sa pagkuha og ininit tubig ang ilang silingang 15 anyos babaye nga nibantay kaniya.

Si Ann Marie nanganak sayo sa buntag sa Biyernes sa birthing center atbang sa ilang panimalay. Ang nahabilin sa ilang balay mao lang ang iyang tulo ka mga anak. Iyang gitugon ang iyang pag-umangkon lalaki nga bayongbayong nga lantawon ang mga bata.

Ang 15 anyos nitawag sa 10 anyos nga si Michael Richard aron magpabukal og tubig kay gamiton sa iyang inahan. Human sa pagpabukal nibalik ang 15 anyos sa birthing center.

Gisultihan ni Ann Marie si Michael Richard nga matulog na kay mingaw na ang palibot.Ang 10 anyos mitubag nga iyaha unang bantayan ang iyang mga manghud nga natulog ug mangabog siya sa mga lamok.

Samtang nangahinanok ang mga bata, kalit nga nibuto ang LPG tank dayon nidako ang kayo. Sa pagkakita sa mga silingan, ilang giluwas ang mga bata.

Ang 10 anyos nakagawas sa balay hinungdan nga ang mga silingan nikuha sa 8 ug 3 anyos. Apan ang 3 anyos nidumili sa pagduol sa mga silingan kay nahadlok, nibalik sa sud hinungdan nga ang 8 anyos ra ang nadala.

“Kini mao ni ato version nga ato nga nahipos gikan sa silingan nga mipadayag nga nabuhian niya ang 3 anyos nga bata. Gidali sa pagkuha ang bata kay natulog pa man, dili mokuyog,” asoy ni Lesigues suma sa ilang imbestigasiyon.

Matod ni Lesigues nga ang hose regulator sa LPG gikatahong mibuto kay kini ang nadungog. Hayan wa mapawong ang tangke, dugang niya. Si Lesigues niingon nga wa dayon sila mapahibawo nga unta duol ra ang ilang buhatan. “Unsa man pud ni gud ang mga tawo nga naa didto inay mopahibalo sa bombero! Gauna man live sa FB, nagpicture-picture, video para maka post. Sus paita,” dugang ni Lesigues.

Sumala niya nga kon gipahibalo pa lang sila dayon masalbar pa unta ang bata. Ang ilang estasyonan 300 metros ang gilay-on gikan sa area. Milabay unag mga singko minutos una sila gipahibawo sa tawo nga nagmotorsiklo. Matod niya nga di lang silay mabasol kay wa sila mapahibawo dayon.

Alas 8:27 na sila sa napahibawo ug giisa nila ang 1st alarm. Pagka-alas 8:30, ilang giisa sa 2nd alarm ug nangayo silag abag sa bombero sa Pinamungajan. Alas 8:40 ilang gipaubos sa under control samtang na fire out alas 9:30 sa gabii. Mokabat sa P150,000 ang gibilin nga danyos sa sunog.