Taliwala sa ilang makapakurat nga kapildihan sa Game 1, ang host Golden State Warriors inilog lang gihapon sa ilang pagpakigbatok og balik sa Boston Celtics sa Game 2 karong alas 8:00 sa buntag, Hunyo 6, 2022 (RP time) sa Game 2 sa 2021-22 National Basketball Association (NBA) Finals sa Chase Center sa San Francisco.
Kini basi sa FanDuel Sportsbook, nga mirehistro sa Warriors nga four-point favorite sa Game Two.
Apan giklaro sa FanDuel Sportsbook nga ang Celtics mao na karon ang inilog nga modaog sa best-of-seven series unya ang ilang lider nga si All-Star forward Jayson Tatum mao na sab ang inilog nga makaangkon sa Finals MVP kumpara sa lider sa Warriors nga si All-Star guard Stephen Curry.
Sa praktis sa Warriors kagahapon, wala’y timailhan nga nibati og kulba ang ilang ginsakupan ug makita sa ilang pamay-ong ang dakong pagsalig nga makabawos.
“It’s really important to turn the page one way or the other,” matod ni Warriors coach Steve Kerr. “If you win and you get happy and you let your guard down, then you’re in trouble. And if you lose and you feel sorry for yourself, then you’re in trouble doing that, too. It’s all about how you respond.”
Kon kasinatian sa finals ang hisgutan, tataw ang bintaha sa Warriors gumikan kay ubay-ubay sa ilang mga sakop ang apil sa ilang puwersa nga kalima nagbalikbalik sa finals gikan niadtong 2015 hangtod 2019 diin tulo ka mga titulo ang ilang nabira.
Sa habig sa Celtics, ang tanan nilang mga magduduwa pulos first-timers sa finals. Hinuon basi sa ilang kadaugan sa Game 1, 120-108, daw wala kini epekto sa ilang duwa.
“I know it may sound arrogant, but when you play for the Celtics, the expectation is to win a championship,” batbat ni Boston center Al Horford, kinsa bag-uhay lang nag-36 anyos.
“Even when I got here in ‘16, that was the expectation even then. That’s what it is in the organization. We don’t have to talk about it. We don’t even talk about it at this point. We’re just taking it a game at a time.”
Ang Warriors kanunay naglabaw sa nag-unang tulo ka quarters sa Game 1 apan duha ka sunodsunod nga rallies sa Celtics sa 4th quarter ang nakatiklo kanila. (AP)