Duha lang sa 17 ka mga rehiyon sa nasod ang negatibo sa pagsaka sa kaso sa coronavirus disease 2019 (Covid-19), base sa ulahing data sa Department of Health (DOH).
Sa usa ka online media forum, si Health Undersecretary Maria Rosario Vergeire nagkanayon nga 15 ka rehiyon, lakip sa National Capital Region (NCR), dunay nakita nga pagsaka sa kaso sa Covid-19.
“We are seeing positive growth rates in all our regions, except in Region 10 (-21 percent) and Bangsamoro Autonomous Region in Muslim Mindanao (-42 percent),” matod ni Vergeire.
“A total of 15 of the 17 regions in the country are now at low risk classification because of their positive two-week growth rates,” dugang niya.
Sumala sa maong data, ang dunay positive growth rates naglakip sa Cordillera Administrative Region (129 percent), Eastern Visayas (72 percent), Caraga (63 percent), Bicol Region (60 percent), Cagayan Valley (59 percent), Calabarzon (58 percent), Zamboanga Peninsula (39 percent), ug Ilocos Region (33 percent).
Dunay pagsaka usab sa kaso sa Central Visayas (28 percent), NCR (19 percent), Soccsksargen (12 percent), Davao Region (10 percent), Central Luzon (nine percent), Mimaropa (six percent), ug Western Visayas (five percent).
Alang sa tibuok nasod, ang DOH nagkanayon nga nitala og 23 percent positive growth rate.
“Nationally, we remain at low risk classification as seen since mid-May,” matod ni Vergeire.
Hinuon, dugang sa health official, ang sitwasyon dili kabalak-an samtang ang healthcare utilization rate nagpabilin sa 15 to 17 percent.
“Despite the uptick in cases, the healthcare utilization rate remains to be at low risk, nationally,” pasabot ni Vergeire.
Sa tibuok nasod, ang Covid-19 bed utilization rate naa sa 17.86 percent. Ang ICU utilization rate naa lang sa 5.9 percent. (SunStar Philippines)