Ang Cebu City Health Office (CCHO) nitambag sa mga barangay kapitan nga mohimo og proactive nga lakang sa pagsanta sa dengue fever human ang gidaghanon sa kaso ug namatay mihinay og saka.
Si Dr. Jeffrey Ibones, hepe sa CCHO, nagkanayon nga gikan sa Enero 1, 2022 ngadto sa Hunyo 3, 2022, ang gidaghanon sa kaso sa dengue miabot og 590. Ang 13 niini namatay tungod sa dengue fever.
Kini nga ihap sa maong kaso mas labaw pa sa ihap sa kaso sa tibuok tuig sa 2021, diin naa lang sa 256 ka mga kaso.
Matod ni Ibones, ilang giila ang 11 ka mga barangay sa dakbayan nga risgo sa dengue tungod sa taas nga kaso sa pagtakboy sa virus.
Mao kini ang mga Barangay Guadalupe (91 cases), Lahug (53), Poblacion Pardo (41), Inayawan (39), Mambaling (37), Kamputhaw (36), Punta Princesa (32), Talamban (31), Quiot-Pardo (28), Capitol Site (20) ug Tisa (20).
Sa tigom uban sa mga opisyal sa CCHO ug Cebu City Disaster Risk Reduction and Management Council (CCDRRMC) niadtong Biyernes, Hunyo 3, ang mga opisyal sa dakbayan ningdapit sa mga barangay kapitan sa pagtaho sa ilang plano sa pagtubag sa pagsaka sa kaso sa dengue sa ilang barangay.
Matod ni Ibones, nangayo na sila og tabang sa Department of the Interior and Local Government (DILG) sa pagpugos sa mga opisyal sa barangay sa pagpatuman sa ilang dengue prevention measures.
Dugang ni Ibones, dunay panginahanglan sa pagpalapad sa kahibalo sa risgo sa dengue ug ang panginahanglan sa pagpanglimpiyo sa palibot labi na sa mga dapit nga itloganan sa lamok nga nagdala og dengue virus, ang Aedes aegypti.
Si Atty. Gerardo Carillo, pangulo sa CCDRRMC, niorganisar og balik sa barangay dengue task force sa 11 ka mga barangay, diin nagtutok sa pagpanglimpiyo sa palibot ug pagguba sa mga puy-anan sa lamok.
Matod ni Carillo, sila nagkasabot uban sa city health officials sa pag-organisar sa information dissemination drives sa tibuok dakbayan bahin sa lakang batok sa dengue.
Dugang niya nga nagplano siya sa pagbalik sa city’s dengue hotline, diin ang publiko makagamit sa pagkuha og kasayoran bahin sa posibling dengue hotspots.
Ang publiko makatawag sa maong telepono sa pagtaho sa sakop sa pamilya nga dunay simptomas sa dengue ug kini makatabang sa daling pagpatubag sa mga personnel sa CCHO.
Dugang ni Carillo, lakip sa plano mao ang paghatag og libre nga dengue testing ug pagpatambal sa pasyente sa dengue sa Cebu City Medical Center (CCMC).
“We need to reinforce our dengue hotline and encourage them to report. The City will shoulder the expenses so they won’t have anything to worry about,” dason ni Carillo.
Sa pagkakaron, si Carillo nagkanayon nga ang CCMC dunay dengue fast lane alang sa mga pasyente nga dunay simptomas niini.
Nagplano usab siya sa pagpatabang sa private sector sa kampanya batok sa dengue.