Gihangop sa Police Regional Office (PRO) 7 ang tinguha sa Department of the Interior and Local Government (DILG) nga no closed-circuit television (CCTV), no business permit policy.
Niadtong Mayo 23, 2022, mipagawas og memorandum ang DILG national niini nga buhatan pag-awhag sa mga siyudad ug munisipalidad sa tibuok Pilipinas paggama og ordinansa nga nag-require sa mga establisemento pagbutang og mga CCTV kon molukat og business permits.
Matod ni DILG Secretary Eduardo Año, kinsa kasamtangan usab nga chairperson sa National Peace and Order Council, dakog matampo sa pagsulbad sa kriminalidad labi na nga daghan nang tawo manggawas sa ilang panimalay tungod sa pagluag na sa restrictions.
“Ngayon ang tamang panahon para i-require ang mga negosyo na mag-install ng CCTV. People are going out of their homes and in various establishments nowadays due to lower COVID-19 cases and a CCTV system is a powerful tool that can aid LGUs in ensuring public safety, deterring crimes, and identifying and apprehending culprits,” sigon ni Año.
Iyang gidugang nga kinahanglan nga manguna niini ang mga local nga kagamhanan sa nasod ilabi na sa matag konseho nga maggama og ordinansa sanglit dako og tabang kini sa pakigbatok sa krimen.
Si Police Regional Office (PRO) 7 Director Police Brigadier General Roque Eduardo Vega mipakitag pagsuporta niini.
Matod niya, ning maong kamandoan, dako og matabang sa kapulisan ang mga CCTV sanglit mapugngan ang bisan unsa nga kriminalidad ug dali usab kini nga masulbad.
“The presence of CCTV cameras in an establishment plays an important function in the daily operations and the public in general. Sa mga malalaking establishments, bago maibigay ang kanilang permit, may CCTV na dapat para na rin sa seguridad ng may-ari, nagtitinda at mamimili. Makakatulong ito sa imbestigasyon at mapapabilis ang pagresulba ng isang krimen. Sa tulong ng teknolohiya, maiiwasan magsagawa ng krimen at magdadalawang isip ang mga kriminal na gumawa ng mga ilegal na gawain,” matod ni Vega.
Gawas niini, matod ni Vega makatabang usab kini sa pag-monitor niadtong nagtinguha nga mohimog teroristang pagpangatake.
Kini nunot sa nahitabong sunod-sunod nga pagpamomba sa Mindanao sa milabayng semana nga tungod niini giisa sa kapulisan ang full alert status sa kapulisan sa Pilipinas.
Sa dakbayan sa Sugbo, aduna nay kasamtangan nga gipangmontar nga mga CCTV sa nag-unang kadalanan apan nangaguba kini atol sa pag-igo ni bagyong Odette.
Apan nipasalig ang kagamhanan sa dakbayan nga ila kining ayuhon ug dugangan pa og laing labing modernong mga CCTV nga maka-capture sa mga panghitabo bisan sa distansya nga lugar gikan sa camera.