Usa ka sakop sa Akrho fraternity talandugon ang kahimtang human gipusil sa sakop sa Tau Gamma Phi fraternity sa Barangay Vito, lungsod sa Minglanilla, alas 3:30 sa kaadlawon sa Dominggo, Hunyo 5, 2022.

Si James Amolata, 25, ulitawo ug taga Barangay Vito, Minglanilla, samdan sa tuong bukton, tiyan, tuong batiis ug talandugon ang kahimtang sulod sa usa ka tambalanan atol ning pagsuwat.

Samtang, ang suspek nga si Jemar Pardillo, ulitawo, taga Barangay Tulay, Minglanilla ug sakop sa Tau Gamma Phi fraternity, wala dayon masikop ug gipangit hangtod ning pagsuwat.

Gikataho nga dunay laing tulo ka kauban ni Pardillo nga giingong nagdala og armas nga wala pa mailhi sa kapulisan apan gihulagway 5”6’ ang gitas-on, naka-jacket, niwangon ang lawas ug pulos nakasul-ob og hood atol sa ilang pag-atang sa biktima.

Si Police Staff Sgt. Allan Villasorda sa Minglanilla Police Station nga nahinabi sa Superbalita Cebu, nagkanayon ang biktima uban sa iyang mga kauban sa Akrho nga nitambong sa disco atol sa kapistahan sa Barangay Poblacion Ward 4 sa lungso sa Minglanilla sa habagatan sa lalawigan sa Sugbo.

Matod ni Villasorda, usa ka sakop sa Tau Gamma Phi nga nagsul-ob sa t-shirt sa iyang fraternity ang nitipon sa grupo sa Akrho sa pagsayaw sa diskohan.

Apan ang igsuon sa biktima nibutyag nga iyang gibadlong nga dili mosagol kay nagsul-ob kini og t-shirt sa Tau Gamma hinungdan nga nag-ilis kini og sinina aron malikayan ang kagubot.

Apan ang maong gipahimangno gikasuko sa grupo sa suspek ug nahitabo ang panaglalis sa mga sakop sa duha sa diskohan.

Dugang ni Villasorda, dihang ng biktima uban sa iyang igsuon ug mga kauban sa grupo nanguli na, giatangan sila sa grupo sa suspek ug gipusil ang biktima makadaghang higayon.

Ang biktima gidala dayon sa iyang mga kauban sa usa ka ospital samtang, ang mga suspek daling misibat ug wala na igkita hangtod ning pagkuha sa taho.

“Kining suya-suya sa ilang fraternity sa mga batan-on, nasuko tungod lang gibadlong dili mosagol,” dugang asoy ni Villasorda sa Superbalita Cebu.

Sumala sa pulis nga gibastusan ang grupo sa biktima kay ang usa sa miyembro sa suspek ang mosagol gyud nila sa diskohan ug nagtuo sila nga gipasingitan gumikan sa suyaay sa grupo.