Ulitawo naangol human gidunggab sa karambola nga nahitabo atol sa usa ka kalingawan sa Proper, Barangay Bolinawan dakbayan sa Carcar, alas 2:20 sa kaadlawon sa Dominggo, Hunyo 5, 2022.
Si Zevson Enjambre Abala, 33, ug ulitawo taga Sitio Tapok, Bolinawan, Carcar nasamdam sa iyang bukobuko.
Nasikop sa follow-up operation si Jerry Mar Dialimas Roda, ulitawo alyas Petpet, trabahante ug taga Sitio Dungo-an, Bolinawan, Carcar.
Si Police Staff Sgt. Regie Amad, imbestigador sa Carcar Police Station nga nahinabi sa Superbalita Cebu, nagkanayon nga ang biktima gikan mitan-aw og concert sa nahisgutang barangay nagsaulog sa ilang kapistahan. Ang suspek usa sab sa nitan-aw sa concert.
Ang biktima padulong na mopauli naglakaw dihang nahitabo ang sinukmagay ni Byron Labajo ug usa ka Hener Anacio.
Matod ni Amad, ang grupo sa duha nagkainitay atol sa concert.
Wala makauyon ang grupo ni Labajo human usa sa kagrupo ni Anacio, misaka sa stage atol sa concert.
Sa concert, nagkainitay na sila kay suyaay ba sakasaka sa stage,” dugang ni Amad, sa pagpanguli nahitabo ang sinukmagay.
Ang biktima miuwang sa kaguliyang. Apan, naigo siya hinungdan nga niapil sa sinukliay sa kinumo.
Ang suspek nakigsinukliay sa kinumo apan nalupig.
Kalit nga nibunot og balik dala ang Batangas knife ug gidunggab ang biktima sa buko-buko.
Ang biktima luwas na hinuon sa makuyaw nga kahimtang.