LAING 25 ka mga balay ang nangaugdaw sa ikaduhang sunog nga niigo sa Dakbayan sa Sugbo Lunes, Hunyo 6, 2022.
Ang sunog niigo sa Sityo Bato, Barangay Ermita pasado alas 3 p.m. nga niangol sa usa ka tawo.
Matod sa Cebu City Fire Office nga ang sunog nagsugod sa balay sa usa ka Merlie Flores ug daling nikaylap sa sikbit nga mga pinuy-anan.
Ang naangol giilang si Antonio Yap, 63, nagpuyo sa nahisgutang dapit.
Ang kayo nilamoy sa 25 ka mga balay nga nakaapekto sa 50 ka mga pamilya o 150 ka mga lumolupyo.
Nagbilin kini og P750,000 nga danyos. Gisusi pa ang hinungdan sa sunog.
Nadawat sa CCFO ang alarma mga alas 3 sa hapon, nakontrolar sa mga alas 3: 42 ug hingpit nga napawong sa mga alas 4 sa hapon.
Ang sunog sa Ermita maoy ikaduhang niigo sa Dakbayan sa Sugbo sa Lunes.
Ang una niigo sa Sityo Kapakulan, Barangay Tisa Lunes sa buntag.