Mokabat sa 400 ka mga benepisyaryo sa lungsod sa Consolacion sa Assistance to Individuals in Crisis Situation (AICS) sa Department of Social Welfare and Development (DSWD) ang nakadawat og cash assistance niadtong Lunes, Hunyo 6.
Ang pagpanghatag gihimo sa Consolacion gymnasium atbang sa Consolacion municipal hall.
Ang maong kalihukan gitambongan usab sa Kagamhanan sa Lungsod ug ni Senador Imee Marcos.
Ang programa nakabenepisyo sa mga kabos nga mag-uuma, mangingisda, ug mga way puy-anan sa lungsod. Nakadawat sila og P2,000 nga cash aid matag usa.
Mao kini ang unang batch sa mga benepisyaryo, tungod kay ang kinatibuk-ang nalista nga mga benepisyaryo anaa sa 1,200 sa lungsod sa Consolacion, matud ni Mayor-elect ug incumbent Vice Mayor Teresa Alegado.
Ang AICS usa ka programa sa gobyerno nga nagsilbi nga social safety net o stop-gap measure aron suportahan ang pagbangon sa mga kabos nga indibidwal ug pamilya nga nag-antos sa wala damha nga mga panghitabo sa kinabuhi o krisis.
Ang programa nagsugod niadtong 2014 ug giusab niadtong 2019 aron sa pagkompleto sa social amelioration program aron masustiner ang mga batakang panginahanglan sa mga pamilya nga grabeng naapektuhan sa Covid-19 pandemic sa panglawas ug socio-economic nga aspeto.
Sa pagkakaron, mga 7,000 ka indibidwal sa tibuok nasod nakabenepisiyo sa AICS cash assistance; kadaghanan gikan sa National Capital Region (NCR) sukad sa Abril 2021, matod ni DSWD Secretary Rolando Joselito D. Bautista.
Ang hinabang sa salapi maglakip sa edukasiyon, medikal, transportasiyon, paglubong, ug pagkaon ug dili pagkaon aron matabangan ang mga benepisyaryo sa paghatag sa mga batakang panginahanglan sa ilang mga pamilya.
Ang hinabang gihatag pinaagi sa nagkalain-laing Crisis Intervention Units (CIU) sa DSWD Central Office, Field Offices (FOs), ug satellite offices sa mga probinsiya.
Ang mga benepisyaryo gisusi usab pag-ayo sa DSWD aron masiguro nga mohaum sila sa kategoriya sa mga nakadawat.
Sa Sugbo, ang lungsod sa Consolacion maoy una sa listahan nga nakadawat sa AICS cash assistance karong tuiga.
Sa pakighinabi sa mga tigbalita, si Senador Imee Marcos, kinsa nagpalig-on sa programa sa AICS, nisubli nga ang AICS cash aid kinahanglan ihatag ngadto sa mas huyang nga mga sektor sa Sugbo ug tibuok Pilipinas.
“Ang trabaho ko po ay mangulit sa DSWD to make sure na mababahagian talaga yung mga pinaka vulnerable sectors in the marginalized communities kaya po tayo andito. Alam naman po natin na mayroon issue ang DSWD na ipinamamahagi lamang ang ayuda doon sa 4Ps families (Pantawid Pamilyang Pilipino Program)na suki na nila.”
“Minsan yung mga yun ay medyo guminhawa na at yung mga ibang nangangailangan talaga d na bibigyan. Kaya tayo po ay nakiki usap na bigyan sana yung totoong mahirap,” dugang niya.
Si Senador Marcos niingon usab nga iyang isugyot ang ideya ngadto sa Senado nga palapdan ang sakup sa hinabang sa tibuok nasud aron matabangan ang mas daghang kabus nga katawhan. Nakig-alayon usab siya sa DSWD bahin sa maong butang.
Samtang dinhi sa Sugbo, mobisita usab siya sa Barangay Mabolo ug Tisa ug ubang mga dapit sa amihanan ug habagatang bahin sa lalawigan aron makatabang sa dugang mga tawo.
Manghatag siya og libreng paniudto, utanon, isda, ug ang iyang ilado nga “Nutri bun” isip paagi sa pagpadayag sa iyang pasalamat ngadto sa mga Sugbuanon.
Siya niingon nga ang mga Sugbuanon nikuha og dakong bahin sa iyang igsuon nga si President-elect Ferdinand “Bongbong” Marcos, Jr.
”I am taking this opportunity to say thank you to all the Cebuanos for their tremendous support to my brother and to the Marcos family and Mayor Inday Sara (Duterte), who is now our vice president. Daghan salamat sa inyong tanan.” matod ni Senador Marcos.