Wa nay utang ang Cebu City Government kon ang loan nga gigamit sa pagtukod sa South Road Properties (SRP) mabayran sa Agusto 2022, sumala sa plano.

Si manlalaban Jerome Castillo, special assistant sa buhatan sa mayor, nitug-an sa SunStar Cebu sa Lunes, Hunyo 6, 2022, nga ang budget ug tanang gikinahanglang mga dokumento nakuha na ug andam na nga isumiter sa Bureau of Local Government Finance (BLGF) sa Manila .

Si Castillo niingon nga ang ilang target nga petsa alang sa hingpit nga pagbayad sa P960-million outstanding balance gitakda sa Agusto 19.

“We will just inform the mayor that the date is fixed and then if he elects to have a ceremonial payoff, it is also good for the purposes of transparency to the public,” matod ni Castillo.

Matod ni Castillo, mao na lang kini ang nahabilin nga utang sa Siyudad, ug ang paghusay niini nga obligasiyon magpasabot nga wala nay utang ang siyudad.

“Yes, that would be the consequence. Zero na ang utang kay na-clear na namo ang tanan. Kining usa ra ang existing loan, debt-free na ta,” matod ni Castillo.

Niadtong 1996, ang Kagamhanan sa Dakbayan nakadawat og 12.315 bilyon yen nga pautang, katumbas sa P4.65 bilyon niadtong panahona, gikan sa Japan International Cooperation Agency pinaagi sa Landbank aron matukod ang SRP.

Hangtod sa 2025 pa unta ang termino sa loan, apan pinaagi sa pag-areglo niini sa dili pa ang takdang petsa, makadaginot ang Siyudad pinaagi sa paglikay sa interest sa loan, matod ni Castillo.

Pinaagi sa pag-settle sa loan, si Castillo niingon nga kini makapauswag sa credit rating sa Dakbayan ug daling maka-avail og loan para sa umaabot nga mga programa ug proyekto.

“Kon makabayad ka sa imong loan on time, it speaks well on your credit capability or credit standing... That speaks well of the capability of the city,” matod ni Castillo.

Ang abogado niingon nga kini nga milestone kinahanglang ipahinungod kang Mayor Michael Rama, kinsa nagsugod sa pagtrabaho sa prepayment sa loan atol sa iyang termino isip mayor niadtong 2015.

Sa panahon ni anhing Mayor Edgardo Labella niadtong 2019, si Labella naghinamhinam sa pagbayad sa kinatibuk-ang utang aron matangtang ang 1.5 porsiyento nga interest rate sa utang, uban ang nahabilin nga balanse nga P1.7 bilyon.

Human sa panahon nga pagkamatay ni Labella niadtong Nobiyembre 2021, si Rama, kinsa milingkod isip mayor, niapil sa pagbayad sa SRP loan sa iyang “21 gun salute projects” aron pagpasidungog sa kabilin ni Labella.