Daghang wa nahimuot sa pamahayag sa usa ka journalist nga nagbase sa kaulohan batok sa tinguha sa umaabot nga kalihim sa Tourism sa administrasyong Marcos nga si Liloan Mayor-elect Christina Garcia-Frasco. Si Raissa Robles adunay tweet nga sa tinguha ni Frasco nga palambuon ang turismo sa Mindanao, hayan mahimong interest kini sa Abu Sayyaf Group (ASG) ug ubang mga bandido nga sila mang-kidnap og mga turista.
Sa samang tweet, midugang si Robles nga angay nga mag-andam si Frasco alang sa negusasyon kon modemanda og kwarta ang mga ASG ug posible siya ang personal nga makigsabot niini. Wa nakauyon si Vice President-elect Sara Duterte-Carpio ning pamahayag ni Roble nga gihulagway niya nga iresponsable ug nanawagan siya nga angay nga maghiusa ang taga Mindanao sa pagkondenar niini.
Nidugang ang anak ni Presidente Rodrigo Duterte nga insulto sa katawhan nga angay nga makatagamtam sa kasinatian sa serbisyo nga gihatod sa iyang amahan alang sa nagkadaiyang dapit sa Mindanao sud sa unom ka tuig. Gitumbok ni Sara nga gipakaubos ni Robles ang mga nahimo sa kahapsay ug kalinaw sa Mindanao sa administrasyon sa iyang amahan nga naningkamot aron mapugngan ang kidnap for ransom groups ug mahanaw uban sa tabang mga lider sa local government units ug nagkadaiyang komunidad.
Nitataw ang mayor sa dakbayan sa Davao nga mismo si Kong. Mujiv Hataman sa Basilan nikompirmar nga way insidente sa kidnapping samtang si Presidente Duterte maoy namunoan ug ang insidente nga naglambigit sa Abu Sayyaf mao ang pagkadakop nila ug pagtahan sa ilang mga sakop lakip ilang mga lider.
Kon mangomentaryo man gani ta gikinahanglan nga aduna tay igong basehanan. Maayo unta kon si Robles may kasinatian isip lumolupyo sa Mindanao nga makakomentaryo siya niini. Gani ang mga mikomentaryo sa iyang tweet mihagit kaniya nga moadto sa Mindanao ug mosuway sa pagsusi didto kon naa pa ba ang kahadlok kay daw sa karaang panghitabo mao da gihapon ang iyang gibasehan.
Panahon na karon nga hatagan og higayon sa umaabot nga administrasyon nga mapalambo ang turismo sa Mindanao aron daghang opurtunidad nga matagamtam ang katawhan. Sa higayon nga molampos si Frasco, daghang mga negusiyante ang mosunod sa pagbubo og puhunan sa Mindanao. (josephelvirtubilan@gmail.com)