Kapulisan sa probinsya sa Sugbo nimando sa mga operatiba sa matag police station nga doblehon ang ilang pagbantay sa ilang kaugalingon kon molusad og case build up sa drug personalities human usa sa ilang kauban sa lungsod sa Consolacion napatay human pusila sa usa ka drug pusher.
Nasubo karon ang tibuok hut-ong sa kapulisan sa Central Visayas nunot sa kamatayon sa usa sa ilang kauban nga sakop sa Drug Enforcement Unit sa Consolacion police station human pusila sa iyang gipaubos sa surveillance nga drug personality.
Dead on arrival sa tambalanan si Police Staff Sergeant Careby-Clyde Alinsug 32, dunay tulo ka mga anak, human pusila ni Reynaldo Ydil, 42, taga Brgy. Carreta, Dakbayan sa Sugbo.
Matod ni Police Lieutenant Colonel Mark Gifter Sucalit, deputy director for operations sa Cebu Police Provincial Office (CPPO) nga adunay ihatag nga ayuda ang PNP sa nahabiling pamilya ni Alinsug lakip na ang tanang mga benepisiyo nga madawat.
Bisan ang local government unit sa lungsod mohatag og ayuda sa pamilyang gibiyaan ni Alinsug.
“We will be reiterating really katong mga precautionary or security measures in the conduct og mga intelligence operations or mga verification so ato na i-reiterate para alerto permi ang atoang mga operatiba,” matod ni Sucalit.