MOPAKATAG ang Davao City Police Office (DCPO) og 2,000 nga mga pulis alang sa makasaysayanong inagurasyon ni Vice President-elect Sara Duterte-Carpio sa Hunyo 19, 2022.
"Wala pay final details but initially, meron ng mga coordinating conferences nga ginahimo. We will be deploying around 2,000 ka mga security personnel for the full coverage sa maong event," tug-an ni Police Major Ma. Teresita Gaspan, tigpamaba sa DCPO sa pakighinabi kaniya sa Davao City Disaster Radio.
Gisulti ni Gaspan nga kining 2,000 ka mga pulis motutok sa kalihukan apan lahing mga personahe ang ipakatag mga checkpoints, hotels, Roxas Night Market, daghang tawo nga mga lugar ug uban pang bahin sa dakbayan sa Davao.
Ang inagurasyon mahitabo sa San Pedro Square ug matud ni Gaspan nga ang DCPO nagrekomendar nga sirad-an ang lugar sugod sa Hunyo 16, 2022.
"The Davao City Police Office recommended na isarado ang the whole San Pedro Street for transport, ug nagrekomenda ta sa City Council for the approval sa rerouting kay accordingly pagasugdan ang pagsarado sa June 16 and as of deployment will be made on June 18," butyag ni Gaspan.
Gilauman ang daghang mga halandong tawo ang giimbitahan aron nga mosaksi sa inagurasyon nga naglakip kang President-elect Ferdinand "Bongbong" Marcos Jr., outgoing President Rodrigo Duterte, outgoing Vice President Leni Robredo, kanhi mga presidente sa Pilipinas, gobernadores, mayores, ug daghan pang uban ug sumala ni Gaspan andam sila nga bantayan ang mga bisita.
"We are ready for that, kada vip adunay protocol officer nga i-assign," pasalig ni Gaspan.
Gipahimangnoan ni Gaspan ang Dabawenyos nga mosaksi sa inagurasyon sa San Pedro Square nga sundon ang mga sumbanan atol sa kalihukan sama sa di pagdala og backpacks, way payong, ug transparent tumbler lang nga botelya ang gitugtan.