Moabot na ngadto sa 10 milyones ka mga pasahero ang nakapahimulos sa libreng sakay may labot sa gipatuman nga service contracting program sa Land Transportation Franchising and Regulatory Board (LTFRB-7).
Si Regional Director Eduardo Montealto Jr., sa LTFRB-7 mipahibawo sa maong gidaghanon human sa pagbalik sa ilang programa nga maoy ikatulong hugna (phase 3 ) sa ilang libreng sakay nga gisugdan niadtong Abril niining tuiga.
Nasayran nga ang DOTr, ubos sa pagdumala ni Secretary Art Tugade,migahin og P7 bilyones alang sa maong katuyoan ug ang P459 milyones niini gitagana alang sa drivers ug operators sa Central Visayas.
“The Department of Transportation (DOTr) and the Land Transportation Franchising and Regulatory Board (LTFRB) are very thankful to the conductors, drivers and operators for their continued service and concern for our commuters,” tipik sa Facebook post sa LTFRB-7. Si Montealto nagkanayon nga hangtod dili pa mahurot ang gitagana nga pundo, magpadayon ang libreng sakay nga gibanabana nga molanat pa hangtod sa unang semana sa Hulyo.
Sa 10,270,073 ka mga pasahero nga nakabenepisyo sa libreng sakay, ang labing daghan niini gikan sa Metro Cebu, Lalawigan sa Bohol ilabi na sa Tagbilaran City ug Negros Oriental sa Dumaguete City.
Sa kinatibuk-an, niabot ngadto sa 709 ka mga public utility vehicles (PUV) ang nagbiyahian sa 51 ka mga rota sa tibuok rehiyon.