Ipadayon nato ang paghisgot bahin sa karma sa duha ka mga opisyal. Sa dihang nagsingabot pa ang miaging eleksiyon, gipangutana sila mahitungod sa ilang plano, ang usa ka taas nga opisyal nitubag nga pera-pera lang yan, kwarta lang ang katapat.
Buot ipasabot, paliton lang niya ang mga botante, segurado na siya nga modaog. Tuod man, nagpabaha gyod siya sa iyang inangayan sa miaging piniliay.
Mihatag pa gyod siya og “ayuda” sa mga mayor unya gisaaran ang mga kapitan og mga minilyon nga mga proyekto kon mobotar sila og straight.
Pasabot, block voting gikan sa mga opisyal sa lalawigan ngadto sa kalungsoran.
Gidawat pod sa mga botante ang dako nga inangayan ug mipasalig nga straight voting.
Hilabihang lipaya nila samtang naghulat sa resulta.
Naunsang pagkaunsaa nga siya na man hinuon ang gilubong samtang ang iyang kaatbang hilabihang dakoa man sa boto.
Nagsugod ang iyang kaluya sa padayon nga pag-abot sa unofficial results gikan sa kalungsoran unya padayon nga misaka ang iyang biya sa kaatbang.
Sa dihang dako na kaayo ang abante sa kaatbang, nagpagawas na lang siya og deklarasyon sa iyang kaparotan.
* * *
Mao kini leksiyon sa mga politiko nga nasobrahan ra sa hambog.
Dili sila angay nga mopagawas og mga istorya nga sama sa nakamenos sila sa mga botante, nga ang mga botante nawong og kwarta unya sayon ra kaayo niya ang pagpalit sa botos.
Ang resulta, gikopras ang iyang kwarta, gidawat tuod, gipasaligan nga botohan pero lahi ang gisulat sa balota.
Ulahi na niya nahibaw-an nga dili diay tanang panahon mapalit niya ang mga botante sa kwarta.
Adunay panahon nga mas palabihon pa sa mga botante nga mobotar sa tawo nga angayan, bisan wala mohatag, kay gusto nila tagaan og leksiyon ang politiko nga hambogero.
* * *
Kining laing opisyal, lahi pod og gibuhat.
Ang iyang tirada ang casual ug job order (JO) workers. Tungod kay gipanggamit man sila sa kampanya, usa ray iyang pahimangno nila. ‘Kon di mi modaog sa inyong barangay, di na ta magkita sa July.’
Buot ipasabot nga kon mapildi ang maong opisyal sa barangay nga gibotohan sa casual o JO, dili na i-renew ang ilang kontrata ug taman na lang sila sa Hunyo 30. Buot ipasabot sab nga sama sa naneguro na daan ang maong opisyal nga segurado na ang iyang kadaogan.
Ang resulta – gilubong sa kaatbang ang maong opisyal ug hilabihan ang iyang kakurat sa resulta. Taudtaod gyod ang iyang kahingangha ug naglisod siya pagdawat sa kamatuoran nga napildi siya. Napildi siya unya gilubong pa gyod sa kaatbang.
Bisan nahadlok, nakatawa na lang ang mga gipang-hulga nga mga casual ug JO kay matod pa nila, tua na, hilabihang panghulga namo, siya ra man diay pod ang na-karma.