Pwerti na untang habhab sa usa ka wanted nga lalaki nga namista sa Barangay Poblacion II, Dakbayan sa Carcar, Cebu niadtong Dominggo, Hunyo 5 apan wa pa gani niya natagamtaman ang kalami sa lechon, siya gipusasan sa pulis nga nakamay-ong kaniya.

Ang maong wanted giila nga si Bryan Tabora Santilla, alyas James Ryan Tabora Santillan, 31, adunay kapuyo, taga Sityo Bonbon, Barangay Ocaña, Carcar City.

Tug-an ni Si Lt. Col. Ardioleto Cabagnot, hepe sa Carcar Police Station nga nahinabi sa Superbalita Cebu, nga ang suspek lima ka tuig nagtago-tago sa Lalawigan sa Negros human nakadunggab patay sa iyang silingan niadtong 2017.

NANUNGGAB

Saysay ni Cabagnot, nga niadtong 2017 gidunggab patay ni Santillan iyang higala nga iyang silingan.

Nasayran nga si Santillan milaban ngadto sa iyang bayaw nga gipasanginlan sa biktima nga mikawat sa iyang manok hiniktan.

Ang biktima nanugon pa ngadto ni Santillan nga ipapauli sa iyang bayaw ang manok nga gikawat niini.

Wa damha sa biktima, kinsa nagmaneho sa iyang motorsiklo niadtong higayona sa pag-adto sa merkado publiko sa Ocaña, Carcar, nga siya patyon.Siya gipara sa suspek.

Napasumangil kini nga mohuwam og P20. Sa dihang mikuot ang biktima og kuwarta diha sa iyang bulsa, dungan sa pagtunol, gidunggab gilayon ni Santillan.

Human sa maong krimen, nisibat si Santillan paingon sa Negros uban sa iyang kapuyo.

Si Santillan nalutsan og warrant of arrest sa kasong murder nga giluwatan ni Judge Joy Redoble sa Regional Trial Court (RTC) 7, Branch 77 sa Carcar City pinitsahan og Septiyembre 26, 2019 nga way piyansa.

NAMISTA

“Nipauli ni siya kay namista taga diha iyang kapuyo. Enjoy sa pagpangumbira uy, tagay as in enjoy kaayo. Wala siya magdahom nga dunay nakaila, namay-ungan sa atong tawo ug napusasan,” asoy ni Cabagnot.

Giingon nga ang balay nga gipamistahan ni Santillan duol ra sa police station ug nalabyan kini sa pulis nga nakasibilyan. Namay-ungan tungod kay inila na kaayo si Santillan nga dugay nang gipangita.

Nahitabo ang komosiyon sa dihang suway nga nilugnot ang subject sa dihang gipusasan sa pulis apan taliwala sa iyang pagkisi-kisi, wa na siyay nahimo ug nadakpan sa katapusan.

TOP 2

Sigun pa ni Lt.Col. Cabagnot nga si Santillan giila nga number 2 most wanted person sa Carcar.

Gihulagway si Santilllan nga idlas sanglit kon adunay report nga sighted sa usa ka lugar sa Carcar, kalit lang mahanaw.